نظام العسكر يبتز “جون أفريك” والصحافي ديالها: إلى بغا يدخل للدزاير خاصها تبدل مواقفها ولا يمشي هو من المجلة
كود هناء ابو علي ////
علمت “كود” من مصادر متطابقة ان رحلة عبر شركة “العال” الاسرائيلية رقم LY3555 واصلة يوم غدا مع مع لحداش الليل لمطار الراشيدية. وفق مصادر “كود” جاي فيها كثر من 150 مواطن من اصول مغربية. هادو خداو تصريح حصري من وزير الخارجية والتعاون ناصر بوريطة. هادو غاديين يطيرو من تل ابيب مع الثلاثة و55 دقيقة بعد الظهر.
وفق ما توصلت اليه “كود” من معطيات حصرية فهاد المسافرين جايين يزورو ويحضرو لموسم ابي حصيرة فمنطقة الگرامة باقليم ميدلت. بعدها عندهم برنامج زيارة شي سيد فارفود قبل ما يمشيو لمراكش ومنها ياخدو رحلة العودة لتل ابيب مع نفس الشركة “العال”.
دابا هادو كيفاش دخلو؟ وفق مصادر “كود” فمهندس هاد الرحلة هو المغرب ياريڤ الباز صاحب كوشنير نسيب ترامب. كيگولو لعب دور كبير فاتفاق ابراهام. عندو مطاحن “تريا”. هادا ولى كيخاف منو بوريطة واللي قالها ليه يديرها.
دابا اللي بغى يدخل لبلادو خاصو يتصاحب مع الباز ويطلبو بحال هادوك الالاف لمغاربة اللي عايشين فالمغرب وحاسباهم بلادهم بعد ما سدات الحدود بطريقة غبية متخلفة.
حسب مصادر “كود” فكاينات رحلات كثيرة فالدجيت بريڤي خاصة من باريس ومن مالگا باش يحضرو لاعياد دينية يهودية.
ودابا هاد بوريطة حتى باش نفذ باش امرو الباز علاش ما فرضش طيارة “لارام”. راه الشركة كتموت.