كود سعاد زرار ////
الاثنين 15 ابريل 2024 دار اجتماع بعمالة الحي الحسني فكازا جمع الطاشرونات. ما جاوش كلهم. حضر شي 35 من اصل اكثر من 120. لكبار رسلو ديالهم: الضحى ديال الصفريوي وبالموري ديال برادة ولجوامعية =مجموعة الجامعي=. اللي ترأسهم هو شي طاشرون سميتو رشيد الخياطي. صفتو من غير “نائب رئيس الفدرالية الوطنية للمنعشين العقاريين” كيهدر باسم “جهات عليا”. دابا نشرحو هاد الشي مزيان ف”كود”. نوضحو كيفاش هادا للي كان كيبيدق للعفورة العامل اللي تشد بالفساد واحد كمامر البصري وباه كان كيدير اتاي للحاج قاسم رئيس المنطقة الامنية فالحي الحسني فداك الزمان الصعيب فالمغرب.
المهم هاد الاجتماع دار بحضور مدير الشؤون الداخلية فعمالة الحي الحسني وشي وحدين كانو كيقيدو كلشي. النقطة اللي هدرو عليها هي توسيع ديك “المجموعة ذات المنفعة الاقتصادية” الخاصة بالمنعشين العقاريين.
كانت هادي كتشمل بوسكورة ودابا غادية توسع باش يدخل فيها انفا والحي الحسني. الاجتماع وفق مصادر حضراتو ل”كود”٬ ما كان فيه لا نقاش لا والو. طاشرون توضح مصادر “كود”٬ هدر باسم القانون وقال باللي خاص تكون دعوة للجمعية العامة للمنعشين العقاريين وهي اللي تحدد جدول الاعمال وتوافق عليه. هنا دخل الخياطي وقال ما معناه “غادي نوافقو على هاد الشي. راه بامر من الدوائر العليا”. اييه يا ولد الخياطي. الدوائر العليا ايلى بغات شي حاجة غادية دوز عليك انت؟ راه غادية دوز على رجالاتها وغادي يكون هاد الشي بالقانون. ثم علاش غير خرج سيدنا من كازا دار هاد الاجتماع. سيدنا كان فكازا. مشى لباريس فزيارة خاصة فالويكاند. بدية السيمانا دار هاد الاجتماع
كلام الطاشرون الخياطي كان فيه تهديد ضد اللي رفضو. من بعد قال لكلشي مادام سكتو اذن موافقين. ولكن علاش؟ على ان كل عملية غادي يديرها الطاشرون: باع شقة يعطي نسبة تقدر توصل حتى 6 الاف درهم. باع فيلا الثمن يفوق 10 الاف درهم. باع ارض يخلي نسبة للصندوق.
هاد لفلوس غادي يسدو بيها ثقبة فميزانية كازا فالبنيات التحتية واللي كيقدرها منتخب ل”كود” فحدود 50 مليار.
لكن هاد الشي راه خطير وبزاف. ما عندش الحق قانونيا لشي جهة تستخلص ضرائب خاصة ايلى كانت كتؤديها. راه حنا دولة. ثم هاد النسبة اللي فرضوها علي كل طاشرون يعطيها٬ واش كتصورو دقيقة وحدة باللي هاد الطاشرونات يعطيوها من جيبهم؟ ابدا. اللي غادي يخلص هو المواطن. هو الزبون. غادي الطاشرون يدخلها فشي قنت باش ما يخلصها الا المواطن.
وفق مصادر “كود” الاخطر فهاد الشي ماشي غير “الجهات العليا” ولا الطريقة٬ بل التهديد. كانت رسالة فيها تهديد للطاشرونات: قبلو ولا دخلو للائحة السوداء. شكون دار هاد لاليست نوار. واش هاد الجمعية؟ ما عندها سلطة. واش الدولة؟ ما يمكنش ليها. ما شرحوش اش كيقصدو فيها. واش الوكالة الحضرية اللي كتعطي رخص للطاشرونات؟ ما كاينش جواب لحد الان. الطاشرونات فهمو الرسالة وتخلعو
الموضوع يالله بدا وغادي يطور بزاف. راه قانونيا هاد الشي خاص النيابة العامة تفتح ملف. راه تشريع خارج التشريع. راه خاصو يطبق فيها جريمة الغذر والفصل 243 من القانون الجنائي. مقال جاي غادي نوضحو اكثر
