نجوى المالحي-كود//
المغني سعد لمجرد لي مازال القضاء الفرنسي مقالش كلمتو الأخيرة في قضية التعنيف الجنسي لي متهم فيها، واخد راحتو ، ومبقاش غير في الفن ولكن داز للاشهار ديال سباق الأمير مولاي الحسن للدراجات.
لمجرد بكل ثقة فالنفس حط فيديو ترويجي ديال السباق فصفحتو على انتستكرام، في 2 ستوريات الأولين الفيديو وفي الثالث كتب ماشتاگ بالبند العريض “الله ينصر سيدنا” و”الله يحفظ مولاي الحسن” و”الله الوطن الملك”، وزاد عليهم هاشتاگ بالنگليزة “فخور حيت مغربي”.
لمجرد ولي دايرين بيه خاص يديرو ليه عقلو وميبقاش يقحم المؤسسة الملكية فالكونط ديالو.
واش من بين قوم الناس مبان غير لمجرد باش يدوي على السباق ديال ولي العهد. اسم سعد لمجرد ولا أشهر من نار بسبب الاتهامات الموجهة ليه وباش يربط اسمو باسم سباق مولاي الحسن خاص بزاف ديال التوضيحات.
