سهام البارودي – كود//

شحال من مرة فحياتك اجتاجيتي تتعامل مع صنايعي مغربي ؟ نجار او بلومبي او تريسيان او طابيسيي …؟ و شحال من مرة تعاملتي مع شي صنايعي و كنتي راضي على التعامل ديالك معاه ؟!

سولت هاد السؤال للناس لي كانعرف و لي دايرين بيا و لقيت انه اغلبهم فاش كايكون عندهم شي بريكول فالدار و كايحتاجو ليه شي معلم كايكحلو بالعما ! و يمكن مورا الشيافر ديال الطاكسيات ! المعلمين و الصنايعية كايبقاو اكبر طبقة التعامل معاها كايخليك غير راض بتاتا ! ووسط عشرة ديال المعلميين غادي تتعامل معاهم تسعود غادي يندموك على النهار لي قررتي فيه تصلح شي روبيني كايقطر و تفضل يبقا يقطر عليك فالنصاصات د الليل و يركب فيك الشلل النصفي بالستريس و لا انك تعيط لمعلم لي غايركب فيك السكر و غايقتلك بالفقصة!

اولا مسألة الوقت : المعلم لادار معاك الجوج راه كايجيك تال الثلاتة و لا الربعة و لا مايجيكش گاع !

ثانيا و ثالتا و رابعا مسألة الوقت عاوتاني : المعلم لادار معاك غايوجد ليك شي حاجة نهار الاثنين فراه فالغالب غايوجدها نهار الخميس و لا الجمعة و لا الاثنين لي مورا الاثنين لي تافقتو عليه.

خامسا : المعلم ماعمرو كايتحمل مسؤولية الخطأ ديالو ! لا ديما كايخرج عينيه فيك و يگوليك ” مايصحابنيش” “مافراسيش” “ماگلتيش ليا” و فاش كاتشد عليه شي زلة و كاتزمطو كايگوليك ” واااا مااااشي شيييي ديييفو ! ماشيي شييي موووشكيييل ! مااااشيييي شييييي حااااجة ” المهم هوا ديما عندو الحق و كايحاول يقنعك بلي خدمتو واخا عوجة زوينة !

سادسا : اغلبهم غير مساطحين مع الحرفة و ماعندهمش شي تكوين يخليهم يبدعو فيها ! ايه كاينين حرايفية مبدعين و لكن اغلب الحرايفية عندنا عطاشة ! عربازة ! كايخدمو خدمة عوجة و ماكايتقنوش شغلهم!

سابعا : ماكاينش الابداع فالصنعة ! كيما كايخدم الكليانة السعدية غادي يخدم للكليانة سعاد و غادي يخدم للكليانة سعيدة … زيرو ابداع واخا فزمن الانترنيت كاينين بزاف ديال السيتات و الفيديوات و التطبيقات خاصة بالديكور و البريكولاج و الافكار الجميلة لي تعطي للخدمة ديال الحرفي قيمة.

التعامل مع بزاف ديال الحرفيين المعلمية و الصنايعية المغاربة كايخليك ترجع سنوات اللور للعهد لي الوقت كان فيه ماعندو تا معنى كي الاثنين كي الخميس كي الثمنية كي الجوج ! “غانجي مورا العصر ” ” ساينيني مورا المغرب ” فحالا حنا عايشين مع العباسيين ! الاستهتار ! كولشي راخيها و الشعار ديالو لي بغا يربح العام طويل ! يصايب ليك خدمة عوجة و يبغي يلصقها فيك بالثمن بزز ! هادشي علاش كانشوف شخصيا بلي الاعمال اليدوية و الحرف مامحتاجاش شي برامج وزارية كبيرة و لا شي حاجة لي تجي من الفوق باش تنعش هاد القطاع  حيت بالاضافة انهم اغلبهم خدام بالنوار و ماكايخلصو تاخرية للدولة، ماغايتصلح والو مادام الناس لي خدامين فهادشي عقليتهم مامرودياش على الجودة و الاتقان و احترام الوقت ! معلوم الشنيوا يكتاسحو السوق و كيطيا و ايكيا و محلات الديكورات الجاهزة تنمو و تكبر و تسحق مع الوقت الحرايفية الصغار حيت هادوك الحرايفية براسهم ماكايبدلو تا مجهود باش يرضيو الزبون و يطورو خدمتهم !