كريم الصوفي – كود//
[email protected]

قالت وكالة أوروبا بريس، أن پوليثيا ناثيونال ف مدينة سبتة شدو، نهار الثلاثا الفايت، متهم باختطاف واحتجاز 6 ديال الحراگة من بينهم امراة، وتم حبسه احتياطيا بناءا على أوامر قضائية. المتهم كان محتجز الضحايا بناءا على تعليمات الشاف ديال الريزو اللي تابع ليه وكانو طالبين منهم يخلصو 8000 أورو باش يحركهم ل شبه الجزيرة الايبيرية.

اعتقال هاذ المجرم جا صدفة. دورية ديال الشرطة الوطنية كانت دايزة وضابط منهم رد البال للشابة المختطفة كتضرب الشرجم ديال الدوزيام الايطاج. البوليس دخلو ولقاو الضحايا محتجزين والشابة مقيدة اليدين وشدو المتهم وحجزو تيلفونات ساتيليت وموطور وأجهزة نظام تحديد الموقع العالمي (جي بي أس) و21 كيلوغرام من الحشيش.

https://www.europapress.es/ceuta-y-melilla/noticia-prision-mantener-casa-ceuta-mujer-secuestrada-cinco-migrantes-retenidos-20220809172728.html