كود- عن يا بلادي//

هذي كثر من 50 عام، وتحديدا ف20 يوليوز 1969، وفمهمة ليهم فالقمر، اعضاء أبولو 11 سافرو ومعاهم “عملة نقدية مشتركة”، كتحمل 73 رسالة ديال حكام من دول مختلفة، وفخضم هذ الرسائل كانت رسالة الملك الراحل الحسن الثاني، اللي شكر فيها الطاقم على روح الأخوة اللي كيتحلى بيها.

الأعضاء الجوج اللي سافرو داك النهار كيتعتبرو أول اشخاص مشاو للقمر، وهوما بوز ألدرين، ونيل أرمسترونكَ، ختارة مايمشيوش بيديهم خاويين، ويديو معاهم قرص عبارة عن عملة، فيها رسائل مصغرة للحكام، مكتوبة مجهريا، تحت عنوان: “من كوكب الأرض”.

رسالة الحسن الثاني تنشرات، هي ورسائل خرى ديال ملوك وحكام، فبلاغ صحافي لوكالة النازا، حيا فيها الملك شجاعة رواد الفضاء فأبولو 11، واشاد بروح الأخوة اللي بيناتهم.

وقال الملك فرسالتو بالضبط “الملك الحسن الثاني والشعب المغربي بغاو يلتحقو بالأمم الأخرى فالعالم، باش يحييو شجاعة او اشخاص حطو رجليهم فالقمر، بروح السلام للبشرية كلها”.

وزاد “نتمناو روح السلام تعم الارض، والتقدم العلمي يعزز الأخوة الكبيرة بين البشر”.

ومرتبطة رسالة المغرب، فمضمونها، برسائل بلدان اخرى، رحبات بالمبادرة، بما فيهم جوج دول عربية بحال تونس ولبنان.

والنازا كانت شرحات، فبيان ليها، كيفاش تنصخو الرسائل على قرص صغير، وقالت أن القرص مكون من عنصر مصنوع من السيليكون، وهو عنصر كيميائي غير معدني، وكاين بكثرة فالطبيعة وكيتستخدم على نطاق واسع في الإلكترونيات الحديثة.

وزادت ان إعلان الحسن الثاني وباقي الرؤساء “تنقش على هذ العملة، بفضل عملية تصنيع الدوائر الإلكترونية المصغرة، وتقلص حجم كل رسالة ل200 مرة، بحيث صبحات صغر من رأس البينيزة، لكن واخا هكذاك كانت قابلة للقراءة الى توضعات تحت المجهر.

وكشفات ان بعض الرسائل كانت مكتوبة بخط اليد، وأخرى منسوخة باللغات للرسمية للبلدان.

https://www.yabiladi.com/articles/details/84649/histoire-1969-hassan-envoye-message.html