كود مدريد ///

زلزال كبير فالصبليون. زلزال كبير بعد حريگ 6 الاف مواطن من المضيق ولفنيدق وغيرها لسبتة. هادو فيهم على الاقل 1500 قاصر. اي هادو ما يقدروش يرجعو. وزير الداخلية الاسبانية مارلاسكا قال باللي لحد الان رجعو 1500 من مجموع الحراكة.

رئيس سبتة خوان خيسوس بيباس قال باللي مدينتو المحتلة اللي فيها 85 الف نسمة٬ كتعيش “غزو” ماشي حريگ. وشبه محللون صبليون هاد الشي ب”مسيرة خضرا جديدة” فاشارة الى المسيرة الخضرا اللي رجع بها المغرب صحراؤو.

الزلزال اللي داروه هاد الشي خلى رئيس سبتة كيخرج فكاع وسائل الاعلام. قنوات واذاعات وصحف ويطلب منهم الدعم. يطلب منهم انقاذ مدينتو اللي ولى فيها فاقل من 8 سوايع اكثر من 1500 قاصر. هاد العدد يمثل 15 بالمائة من القاصرين اللي موجودين فهاد الدولة. ناض كيقول باللي اسبانيا فخطر. خاص دعم كبير.

حكومة مدريد استاجبات ليه ورسلات ليه 150 بوليسي و50 الحرس المدني ونتاشر الجيش فالحدود البحرية ال طاراخال. رئيس سبتة كيهدر على ضرورة يلقاو حل مع المغرب ويرجعو هاد الناس والا لمدينة ضاعت.

هاد الاحداث اللي زلزلات مدريد خلات رئيس الحكومة سانشيز يتاصل برئيس سبتة ويقرر يدير اجتماع مع رئيس المعارضة اليميني بابلو كاسادو وخلاه اكثر يلغي زيارتو لباريس. كان غادي يحضر لاجتماع تماك على افريقيا. سانشيز اللي ما سمعناهش فقضية غالي رجع للواجهة وقال باللي غادي يوجه خطاب للشعب.

لكن كيفاش هاد الزلزال رجع قضية غالي فالواجهة. غالي اللي كان دخل ف18 ابريل اللي فات لاسبانيا بجواز سفر ديبلوماسي جزائري وهوية مزورة وداوه لصبيطار لوكرونيو. اليوم قررات وزيرة الخارجية ايالا تلاقى مع رئيس جهة “لاريوخا” اللي فيها هاد الصبيطار. الاعلام الاسباني كيهدرعلى هاد القضية ديال غالي.

الاعلام الاسباني خاصة القنوات الوطنية “الاولى” و”الثالثة” و”السادسة” ولاو كينقلو مباشرة حريك لمغاربة. الموضوع رجع اهم موضوع فالبلاد. اهم من اتفاق التيار الانفصالي على تشكيل حكومة فكاطالونيا والي من الاهداف ديالو الاعلان مرة اخرى عن استقلال الاقليم والتوجاد لهاد الشي.

فالاعلام الورقي. صحف ما تسوقاتش بقضية غالي ولات مخصصة صفحاتها الاولى للموضوع. هاد الشي دارتو “الباييس” و”ا بي سي” و”لاراثون” وعدد من الصحف. الاذاعات مخصصة تغطية غير مسبوقة للحدث. كلشي ناضت فيه العافية. بانت ليه سبتة غادية تمشي

قبل ما كان حتى حد ما كان يجبد هاد الموضوع ديال غالي. مع هاد الهجرة الجماعية٬ كلشي رجع للاور. طبعا ايلى كثر هاد الشي اكيد غادي يدير ازمة كبيرة فاسبانيا ممكن تنعاكس سياسيا