كود كازا ///
علمت “كود” ان مدراء عدد من الجرائد اليومية غدا دايرين اجتماع بمقر جريدة “الصباح” بشارع المسيرة الخضراء. هاد المدراء باغيين يلقاو حلول لتأسيس تجمع مهني جديد بديل على فيدرالية الناشرين المغاربة “لافميج”.
وفق مصدر “كود” فان التدبير الكارثي للفيدرالية فعهد الرئيسة الحالية بهية العمراني لقرار الحكومة بوقف طبع وتوزيع الصحف دار زلزال فالقطاع. الخسائر كثرات. دابا هادا ماشي انقلاب٬ وفق مصادر “كود”٬ بل اتجاه لخلق فيدرالية قوية فيها جمعيات مهنية قوية كل وحدة دافع علي مصالحها. اليوميات اللي كتطبع عندها مشاكل والجرائد الالكترونية عالم بوحدو بالمشاكل.
هاد اللقاء الاول اللي فيه مدراء يوميات قوية غادي يكون تنسيقي وفق مصدر “كود”.
يعني القطاع مأزم بزاف وغادي تزاد الازمة وكاينة بدائل للخروج منها بهاد الشي.
خلق بديل جديد فكرة مزيانة كل قطاع خاصو يقلب على شي بديل. قبل خاص يتعرفو امور كثيرة على واش كانت مشاورات بين الحكومة وقطاع الناشرين قبل تعليق طبع وتوزيع الجرائد وعلاش طاح الدل بهاد الشكل على هاد القطاع.
دابا كاين جيل جديد فالقطاع خاصو هو اللي يتحكم فالتجمعين المهنيين بجوج. اولا كانت ديما فيدرالية الناشرين عندها استقلالية قبل ما تجي فضيحة الزيارة للصين اللي نظماتها فيدرالية كمال لحلو وتبعاتها لافميج. ثم هاد التجمع ورثوه اللي اسسوه النهار الاول. هما اللي كيحكمو فكلشي. فاهم اللجان فاهم القرارات. اللي خاص مستقبلا مع اللي غادي يخرج هو يجيبو نسبة كبيرة بزاف من الشباب الناشر وباراكا من الجيل لقديم. باش يكون الدفاع على المصالح دالقطاع قوي خاص المسؤولين يكونو حاضرين بقوة فالنشر. عندهم جرائد او مواقع اخبارية اللي مشهورة وعندها تأثير.
القطاع كولو دالصحافة المكتوبة مهدد يولي من الماضي٬ بلا دفاع قوي بمحامين اقوياء هاد الانهيار غادي يكون سريع. اما قطاع الصحافة الالكترونية فعندو مشاكل كثيرة وقدامو اوراش كبيرة. خاصو محاميين مزيانين حتى هو. الخوف اليوم هو يهيمنو عليه الفرنكفونيين ويتحكمو فيه. غادية تكون النتيجة مقودة.
