كود سبور//
قرر زكرياء الوردي اللعاب السابق للرجاء الرياضي، يرحل من الزمالك المصري بسبب الضغط الكبير اللي عاشو من شي محسوبين على الفرقة اللي كانوا كيهاجمهو وكينتاقدوه بشكل قاصح، الشي اللي خلاه يمشي من الفرقة من بعد أشهر قليلة باش سنا معها.
وخرج مرتضى منصور رئيس الزمالك ففيديو وكان معه زكرياء الوردي وتكلم على الحالة الصعيبة اللي كيعيش فيها اللعاب المغربي مدة هادي، وكشف بلي هادشي واقع له من فينال السوبر المصري ملي ضاعت له واحد الكرة ضد الأهلي وتماركات على فرقتو، واخا ما كيتحمل فيها حتى مسؤولية حيث البوسط اللي كان لعب فيه ماشي ديالو.
وعلن مرتضى منصور على رحيل زكرياء الوردي من الزمالك المصري من بعدما اتفقو على فسخ العقد اللي بينهم، وأكد أن اللعاب المغربي غادي يرجع لفلوس اللي خدا من الفرقة ملي سناو معه وغادي يخليوه يمشي يقلب على فرصة جديدة مع فريق آخر فالميركاتو الشتوي اللي جاي.
