وكالات //

السلطات فالطاليان فرضات خطية وصلات ل1000 أورو على مول قهوة “Ditta Artigianale” فمدينة فلورنسا، عاصمة إقليم توسكانا، بسباب كاس ديال إسبريسو.

جورنال “The Guardian” البريطاني قال أن الكليان خلص 2 أورو عوض أورو واحد مقابل الكاس اللي شرب، وهو الثمن اللي شافو محدد ومكتوب فلاليست اللي معلقة، ولكن قالو ليه فالمحل بللي راه الأثمنة تزادت غير مزال ماكتبوهاش، ومن بعد احتجاجو وسط القهوة ناض اتاصل بالبوليس وعاود ليهم أشنو وقع.

مول القهوة، فرانشيسكو سانابو، ما عقلوش عليه البوليس، وخا الكاليتي ديال القهوة عندو مزيانة، والمحل مشهور فالطاليان كاملة وفايت ليه رابح جوائز فالضومين، زائد أنه (فرانشيسكو) عيا ما يفسر ويبرر الخطأ ديالو، ولكن فاللخر دارو معاه اللازم وطبقو عليه القانون لأنه زاد فالثمن بلا ما يدير لاميزاجور للاليست ديال الأسعار المعروضة للكليان.