كود سبور//
تم اختيار الإطار الوطني عادل الراضي المدرب ديال فريق الجيش الروندي بجائزة أفضل مدرب فروندا، فالموسم الكروي ديال 2021- 2022.
وجا الاختيار ديال المغربي عادل الراضي باش يفوز بالجائزة ديال أفضل.مدرب فروندا، من بعد التألق ديالو مع الفريق ديال الجيش فالدوري الروندي والتتويج معه بالبطولة المحلية.
للإشارة فنادي الجيش الروندي متمسك بالإطار عادل الراضي، وهاذشي لي جعل المسؤولين ديالو يجددو معه العقد لمدة ديال عامين أخرى، وبالتالي فالمدرب المغربي غيستمر فالتدريب فروندا حتى عام 2024.
وكتعتبر التجربة ديال الإطار الوطني عادل الراضي استثنائية بالنسبة للمدربين المغاربة، حيث قليل فين كنسمعو أن مدرب مغربي كيدرب فريق فالأدغال الإفريقية، مع العلم أن عادل الراضي كيتوفر على شهادات عليا فالتدريب وسبق ليه العمل فبليجكا، لكن ما تمنحاتوش الفرصة فالمغرب.
الراضي قرر يغامر ويقلب على راسو فإفريقيا وهاذي شجاعة منو حسب بزاف ديال المتتبيعين لي كيشوفو أنه ختار يتغرب فالادغال الإفريقية القاسية، وما يتخباش فالفرق الوطنية كيفما كيديرو بزاف ديال الأطار الوطنية لي كل عام كتلقاهم مع فريق.