الدريب لـ گود: الناصيري عطى لكثير للوداد وهادي صفحة وطويناها ودابا حقبة جديدة برئاسة البرناكي وغنخدمو لإرضاء الوداديين
عفراء علوي محمدي- كود//
“كود” سولات مشاهير وسياسيين وفنانين ومؤثرين وإعلاميين على كيفاش كيدوزو نهارهم فهذ رمضان الاستثنائي مع كورونا، وعلى رأيهم فالإنتاجات الرمضانية.
الممثل امين الناجي كان ضيفنا فهذ الحلقة، وها شنو قال لـ”كود”:
كيفاش كتدوز رمضان دابا اللي مسدود علينا؟
رمضان بالنسبة ليا “مود كونجي”، حيت أغلبية الإنتاجات ماكيخدموش فيه، هذي مناسبة باش نرتاحو من التورناجات ديال العام كامل، حيت خدمتنا ماعندهاش وقت محدد ومافيهاش كونجي، بالنسبة للحجر الصحي فبحالي بحال كَاع المغاربة، كنحاولو نشغلو راسنا بحوايج كيهمونا، كيعجبونا..
كيفاش كانت تجربتك ف”ولاد المرسى”؟
“ولاد المرسى” كانت تجربة صعيبة شوية، حيت خدات مننا 6 أو 7 شهور، بديناها قبل الحجر، وصورنا وحبسنا، وتسنينا حتى سالا عاد كملنا، المدة ديال الراحة كانت طويلة وسط التورناج، صعيب حيت خصك تبقى فليديمونسيون ديال البيرسوناج وماضيعهمش، باش مايكونش اختلاف بين اللي صورنا فاللول ومن بعد، لكن فالمقابل هذا عمل زوين وانا راضي على النتيجة.
كيجاوك أعمال رمضان؟
إنتاجنا فيه الجيد والأقل جودة، مانقولش الخايب حيت حتى هو عمل فيه مجهود، والحوايج اللي زوينين باينين، كاينين مسلسلات درامية زوينة، بحيث كاين تطور على مستوى القصة والتشخيص والتطور التقني فالصورة والصوت والمونتاج، وولينا نشوفو الجمهور كيتبع وكيتسنى وكيتفرج ومشوق وكيتفاعل، وهذ الحركية مسألة صحية حيت هذا هو الهدف من أي عمل فني، لكن كاين نقص على مستوى كتابة السيتكوم، وكيفاش كيتركب ويتصاوب ويخرج والسيناريو ديالو..
شنو رأيك فدعوى محامين ضد إنتاج تلفزي اعتبروه “كيسيء للمهنة”؟
نبغي نشكر السيدة لطيفة اخرباش رئيسة “الهاكا”، اللي وضعات حد لهذ “القفزات”، حيت “مول الفز كيقفز”، وأي عمل فني عمرو يهين، يقدر الفنان يدير تحليل ولا انتقاد لمهنة باش يحط صبعو على الخلل بطريقة فنية، وكَاع الشخصيات ناس فاعلين فالمجتمع، عندهم مهن، فمايمكنش كلما دوينا على مهنة ما ينوضو صحابها يغوتو..