عفراء علوي محمدي- كود//

“كود” سولات مشاهير وسياسيين وفنانين ومؤثرين وإعلاميين على كيفاش كيدوزو نهارهم فهذ رمضان الاستثنائي مع كورونا، وعلى رأيهم فالإنتاجات الرمضانية.

الممثلة حنان المسعودي كانت ضيفتنا لهذ الحلقة، وها شقالت ل”كود”:

كيفاش كتدوزي رمضان دابا اللي مسدود علينا؟

ليس هناك ما هو خارج علي المألوف، بحالي بحال باقي المغاربة، فالكل أصبح يتعايش مع الأوضاع اللي فرضها علينا وباء كورونا، والحمد لله على كل حال فالأمور كما يقال تحت السيطرة، وخصوصا ان المرحلة العصيبة قد ولت ووبدات ملامح الفرج تلوح في الأفق، وهذشي كلو تحت سياسية صاحب الجلالة نصره الله  وأيده، وحنا كنفتخرو بيه ملكا لنا.

كيجاوك مسلسلات رمضان؟

الإنتاجات غزيرة هذ العام، وكاين تقدم جد ملموس، وكل ما كثرت الإنتاجات كثر التنافس، وهذا لصالح الجمهور المغربي الذواق، من جهة أخرى فكباقي الجمهور أتابع ردود الفعل على كل الأعمال الرمضانية، وكنلقى انا الأغلبية عندها نفس الرأي على نفس العمل، و هذا ما يأكد أن الجمهور المغربي ذواق وذو حس فني، وانا كنعتبرو الناقد الأول.

شنو رأيك فسدان المسرح؟

أنا ماشي ضد أو مع، أنا مواطنة مغربية يسري علي ما يسري على باقي المواطنين، ولست أهلا لأن اقول شنو خاص الدولة أو السلطات المعنية تدير او تقرر.

شنو رأيك فالناس اللي انتقدو إنتاجات حيت “كتسيء لمهنيين”؟

الهاكا جاوبات بهذا الخصوص، وفيه فنظري رد اعتبار للعمل الفني و حرية التعبير،  اما من ناحية رأيي  فأنا أرى انا لكل دي حق حقه، الصحافة كتدافع عن حقها في حرية التعبير، وميادين أخرى كذلك، إذن علاش لجم العمل الفني إلى كان كيتعتبر مرآة لنبض الشارع ومآسيه؟

شنو الجديد ديالك؟

كاينين عدة عروض كندرسوها مع فريق العمل، وخصوصا الأعمال العالمية اللي كتكون فيها حساسية من ناحية إختيار الدور اعتبارا لعدة أشياء، من بينها هويتي كمواطنة مغربية مسلمة، حيت كل ما يمس مقدسات وطني ماكنقبلوش وكذلك ديني، وكنواعد الجمهور أنه غيكون على موعد معي قريبا إن شاء الله، وكثيرا، غي كنتمنى ما نطلعش لكم فالراس.