عفراء علوي محمدي- كود//
“كود” سولات مشاهير وسياسيين وفنانين ومؤثرين وإعلاميين على كيفاش كيدوزو نهارهم فهذ رمضان الاستثنائي مع كورونا، وعلى رأيهم فالإنتاجات الرمضانية.
الكوميدي محمد باسو كان ضيفنا فهذ الحلقة، وها شنو قال لـ”كود”:
كيفاش كتدوز رمضان دابا اللي مسدود علينا؟
هذ رمضان الخروج فالليل صعيب، عدا إلى كنتي حصلتي فشي قنت مع صحابك، وإلا راك غتبقى فالدار مع العائلة. أنا نهاري كندوزو عادي، كنراجع شوية كنعاون فالشقا دالدار، وكنعطي وقتي كلو لمالين الدار، الظروف ماكتسمحش للخروج بالليل والعراضات كيف مولفين قبل…
كيجاوك أعمال رمضان؟
ماتفرجتش بزاف، باستثناء الاعمال اللي شاركت فيها، حيت كاين عدد كبير، لكن من خلال شنو شفت فمواقع التواصل الاجتماعي كاين استحسان لبعض الأعمال من طرف الجمهور، لكن مازال ناس كينتقدو أعمال أخرى، فنظري ماخصش الإنتاج يكون رهين برمضان فقط، بل خاص يتوزع على طول العام، وفرمضان يكون اكثر بشوية، باش مايكونش شي زوين وشي مازوينش، وهذ الكثرة كتخلي يجيوك فرص كثيرة مرة وحدة…
واش تعطاوك فرص هذ الموسم؟
جاوني 4 فرص دقة وحدة، فكنكون مضطر أنني نختار، حيت كيكون التورناج فنفس الوقت… كانو عندي العروض فسيتكومات على “الأولى”، فماكتابش نشارك فكلشي حيت ماكنتش غنقدر نوفق.
كيفاش كانت مشاركتك ف”قهوة نص نص” و”فين غادي2″؟
الجمهور اللي يمكن ليه يدير هذ التقييم، هي تجارب تزادت فرصيدي الفني، كتخليك تكتشف حوايج جديدة فراسك، بالنسبة ل”قهوة نص نص”، ولو انني ماخاصنيش نقول هذ الكلام، لكن أنا راضي على مستوى السلسلة، مخدومة مزيان والإخراج زوين والممثلين والتصوير والأجواء كانت رائعة.
شنو رأيك فدعوى المحامين ضد السلسلة؟
مايمكنش عمل كوميدي تكون الغاية منو هي الإساءة لشخص أو مؤسسة، ممكن الناس كياخدو الامور بجدية، او ممكن كيف قال البعض شافو ان هذ السلسلة كتلامس جزء من الواقع، لكن فآخر المطاف، راه مافيها حتى إساءة لأي كان.
فوقاش غترجع سلسلة “ناطق غير رسمي”؟
من بعد العيد غترجع، حيت ناس بزاف عجباتهم وبداو يسولو عليها، أنا بصراحة كنت حبستها فخطرة لكن مادام لقات هذ الإقبال غدي نزيد حلقات، وغتبقى بنفس الطريقة ونفس الساركازم السياسي اللي كيتكلم على مواضيع اجتماعية وسياسية، والغاية منها الأولى والأخيرة هي الإضحاك.
