الرئيسية > تبركيك > رمضان وكونفينمون (الحلقة 18). جواد السايح فحوار مع “كود”: كنكَلس فالدار حيت كازا ولات مخنوقة بقوة الحفاري.. وإلى جا كل مهني يدعي إنتاج فني ماغنساليوش
02/05/2021 21:00 تبركيك

رمضان وكونفينمون (الحلقة 18). جواد السايح فحوار مع “كود”: كنكَلس فالدار حيت كازا ولات مخنوقة بقوة الحفاري.. وإلى جا كل مهني يدعي إنتاج فني ماغنساليوش

رمضان وكونفينمون (الحلقة 18). جواد السايح فحوار مع “كود”: كنكَلس فالدار حيت كازا ولات مخنوقة بقوة الحفاري.. وإلى جا كل مهني يدعي إنتاج فني ماغنساليوش

عفراء علوي محمدي- كود//

“كود” سولات مشاهير وسياسيين وفنانين وإعلاميين ومؤثرين على كيفاش كيدوزو نهارهم فهذ الرمضان الاستثنائي مع كورونا، وعلى رأيهم فقرارت خداتها الحكومة.

الممثل جواد السايح كان من محاوري “كود”، وعاود لينا على كيفاش كيدوز رمضان ورايو فالانتاجات التلفزية.

كيفاش كتدوز رمضان دابا اللي مسدود علينا؟

هذ العام وداك العام سنتين مختلفتين على قبل، كاينة دابا جايحة كورونا، وكنحاولو نطبقو كَاع اللي وصاتنا بيه الحكومة.. انا الصباح عادي ماكينش شي جديد، من غير اني كنمشي للجامع ماكنبغيش نخرج بزاف حيت مازا ردوها كلها حفاري وولات مخنوقة، مرة مرة كنطل على محالي، ومن مور الفطور كنكَلس فالدار، ماشي بحال قبل كنت نخرج ونشوف الأسرة والأقارب.

واش الإجراء اللي اتخذاتو الحكومة مزيان؟

قرارات فمحلها وهوما عارفين شكايديرو، وهذشي خصو يدار فنظري، خصوصا منين كتشوف ان دولة بحال الهند وكتعرف تفاقم وبائي خطير، وحتى حنا وثيرة الحالات كانت ارتفعات عندنا غير بعد عيد الكبير، وهوما دابا خايفين لا نوقعو فنفس الخطأ مع رمضان…

شنو رأيك فمنع التراويح؟

الظروف الحالية فرضات اننا نكَلسو فالدار، السخط من القرار كنظم مسالة عادية حيت الناس ولفو التراويح، لكن ماعندنا ما نديرو، الانسان يقد يصلي التراويح فدارو، أما بالنسبة للناس اللي كيشوفو أن الازدحام كاين فالأسواق والزناقي بالنهار وفينما مشيتي، وهنا، حتى إلى كان شي ذنب، غياخدوه ما، ماشي حنا، حنا ما علينا غير الامتثال لهذ القرار، ونثيقو فالحكومة.

كيجاوك مسلسلات رمضان؟

الانتاجات هذ العام كثار، كاين واحد مورا واحد ومايمكنش تشوفهوم كاملين، الدراما فنظري ولات غادة مزيان لا فالأولى ولا فدوزيم، كَاع الاعمال فالمستوى وغادة فخط تصاعدي تبارك الله، اما فالكوميديا باقي نفس التعربيز والتخربيق، خصهم يحاولو يحيدو دوك ليسيتكوم حيت صعاب، ونرجعو للسكيتشات، السيتكومات ستيل امريكي ماقدوش عليه حتى الفرنسي وحيدوه، وحنا ماعطيناش فيهم ومازال بنادم يقول “الحموضية”.

شنو رأيك فانتقاد إنتاجات حيت “كتسيء لمهنيين”؟

الى دخلنا فهذ المجال ماغايبقاش الابداع ! إلى جات أي هيئة تدعي الأعمال التلفزيونية ماغانساليوش، فميريكان وفرانسا كيكريتيكيو رؤساء دولة ماشي غير محامين وأطباء وشيفور التوبيس، حنا بلاد ديموقراطي وعندنا الفساد فكلشي، ناس مزيانين وخايبين، وإلى جا كل واحد يدعي شي حد على شي عمل هضر على مهنة غيوليو الفنانين يخافو ويديرو حواجز، وهذشي غيشنج الإبداع.

شنو الجديد ديالك؟

كاين تيلي فيلم “سالف عذرا”، اللي على حساب التصريحات مؤلفو أحمد ابو عروة عرف نسبة مشاهدة مرتفعة، وكذلك مشارك فمسلسل “سوق الدلالة” اللي باقي ماتعرضش.

موضوعات أخرى

28/03/2024 14:45

بوليس سيدي قاسم شدو 4 فيهم واحد قاصر بانو ف فيديو هازين السيوفا وكيسبو فمؤسسات وموظفين عموميين وكيحرضو على تنفيذ اعتداءات

28/03/2024 14:28

واش الحكومة غاتحل الحمامات مور الشتا لي طاحت.. بايتاس لـ”گود”: على حسب كل إقليم والوضعية ديال الماء فبلادنا صعيبة ونسبة الماء لي دخلات للسدود ضعيفة

28/03/2024 14:22

تعيينات جديدة فمناصب عليا دازت اليوم فمجلس الحكومة: منهم مدير المحروقات ومدير الموارد البشرية فوزارة الخارجية

28/03/2024 14:00

“الهاكا” مسؤولة على فضيحة “مومو” مع “هيت راديو”. كيفاش تعطلات تخرج قرار فاكثر منشط عاقباتو

28/03/2024 13:30

وزير النقل للساقطين فامتحان البيرمي: غانعطيوهم فرصة جديدة ومغاديش يتحسب امتحان الاثنين والهدف من الأسئلة الجديدة هو نقصو من الكسايد

28/03/2024 12:45

ليلة “العشاء الأخير” فحزب الاستقلال: هادي 3 قضايا كبرى غادية تشعل حروب ف “الميزان” قبل وبعد المؤتمر

28/03/2024 12:30

من هنا لسيمانة.. اللي عندو شي طوموبيل أو موطور ففوريانات كازا ومجاش سحبهم غيتباعو