عفراء علوي محمدي- كود//

قال الفنان المغربي نعمان الحلو أنه امتنع على أخذ الدعم ديال وزارة الثقافة، اللي خرجات ليه فيه 16 لمليون، باش يحيد عليه الشبهات واللبس اللي وقع مع المواطنين المغاربة.

ووضح الحلو، فتصريحو ل”كود”: “المغاربة اللي خرجو يستنكرو اعتقدو ان هذ الدعم غنديروه فجيوبنا، ولكن بالعكس، الدعم مشروع 100 فالمية، وتعطى بالدرجة الأولى لتمويل المشاريع الفنية”.

وقال أنه كان كيوجد 4 مشاريع غنائية لكنه الآن اضطر باش يأجلها حيت ماغياخدش الدعم، “وهذ المشاريع هي أغنية “التوحد” اللي كتتكلم على هذ المرض وغيغني معايا فيها طفل مريض بيه، و”جواهر” ديال علاقة حب بين شابين من المغرب والجزائر واللي مكملاتش وفرقاتها الحدود، وأغنية “ملكوت” اللي كتتكلم على الذات الإلهية، ثم أغنية “أمنا الأرض” اللي كتهضر على الطبيعة وضرورة حماية البيئة”.

وكشف لحلو أن الوزارة كتعطي فالدعم تمويل ديال 60 فالمية لكل مشروع فني، كشركة ديال الانتاج، وكتبقى 40 فالمية كيعطيها الفنان من عندو، “المشروع راه ضروري باش يكون خاصو تمويل، حيت كنخلصو الموسيقيين والاستوديو وشحال من حاجة، وبالتالي مايصلاحش لي نكمل فالمشاريع اللي خدام فيهم، وغنأجلها دابا حتى لوقت لاحق”.

وبمجرد ما ناض الصداع على مواقع التواصل، وانتقدو المغاربة الدعم اللي تعطى للفنانين والفلوس اللي خداو، واللي تراوحات بين 5 حتى ل16 لمليون لكل واحد واللي تحددات الكلفة الإجمالية ديالو فالمجموع ف مليار و400 مليون سنتيم، دار لحلو تدوينة كيعلن فيها أنه قرر يمتنع على أخذ الدعم، وكيطلب من الوزارة تحولو لصندوق كورونا.