نجوى المالحي -كود //
احتفل الفنان رشيد الوالي ومراتو ابتسام بالتخرج ديال ولدهم سليم الوالي، لي كان كيتابع الدراسة ديالو في جامعة الأخوين في إفران، ولي خدا منها باشلور bachelor فنون تخصص دراسات الاتصال.
رشيد الوالي شارك الفرحة ديالو بولدو على صفحتو في انستكَرام، ونشر تصويرة مشتركة بين سليم ومراتو ابتسام من وسط جامعة الأخوين، وكتب عليها كلمات مؤثرة.
وكتب رشيد الوالي “عشنا اليوم لحظة تسلم شهادة التخرج من جامعة الأخوين لابننا سليم. لحظة تختلط فيها الدموع والابتسامة ونسيان كل التعب. شكرا حبيبي سليم على هذه الهدية”.
رشيد الوالي شكر الابن ديالو على الشهادة لي اعتبرها هدية كبيرة ليه وقال “طبعا الشهادة تخصك لكن طعمها نحن الأباء من يشعر بقيمتها. شكرا لمجهودك ولتحديك لنفسك. الله يحفظك وينور طريقك. والله يحفظ وينور طريق أولادنا جميعا. فعلا يوم بطعم خاص. الحمد لله. وشكرا لكل من مد لك يد المساعدة في وقت من الأوقات من أساتذة ومؤطرين وأصدقاء”.
وحتى ابتسام بارطاجات منشور فيه تصويرة من 2016 فاش يالاه سليم دخل للاخاوين، واخرى من 2020 فاش تخرج.