عفراء علوي محمدي- كود//

علنات وزارة السياحة والصناعة القليدية والنقل الجوي والاقتصاد الاجتماعي أن استئناف الطيران الجوي الداخلي فالمغرب غيكون ابتداء من الخميس 25  يونيو 2020.

وحسب بلاغ للوزارة، حصلات “كَود” على نسخة منه، فالعاملين وسط المطارات والطيارات، والمكتب الوطني ديال المطارات غادي يوفرو مجموعة من الإجراءات الصحية والوقائية المعترف بها بنجاعتها فالمطارات على المستوى الدولي، اهمها توفير المغقمات وإجبارية وضع الأقنعة واحترام مسافة الأمان، باش تحافظ على صحة المسافرين.

وبالنسبة للتنقل من المنطقة 1 للمنطقة 2، وغيخص ضروري يتوفر المسافر على ترخيص مهني أو يكون عندو ظرف صحي مستعجل، أو يحصل على أوطوريزاسيون تتعطى من طرف السلطات المحلية لظروف قاهرة.

ومجموعة من الخطوط غيبداو، منها: كازا الداخلة، كازا العيون، كازا وجدة، كازا أكادير، فاس مراكش، أكَادير طنجة، ومراكش الداخلة، والبروكرام ديال الرحلات غيكون متوفر فموقع الشركة الوطنية، اللي غترفع من عدد الخطوط ديالها شوية بشوية، وبشكل تدريجي.