كود الرباط//

رسميا، المجلس الحكومي غادي يطير مديرية الأدوية والصيدلة، أهم مديرية بوزارة الصحة لي كتعطي التراخيص للشركات ديال الأدوية، وتعطي الإذن باستيراد المستلزمات الطبية وكتوافق على كولشي، وعندها سيستيم ديال الصفقات الكبيرة بالملايير.

المجلس الحكومي غايصادق الخميس المقبل على مشروع قانون بإحداث الوكالة المغربية للأدوية والمنتجات الصحية، هاد الوكالة هي بديل على مديرية الأدوية والصيدلة.

كان جدل كبير على طريقة تدبير الصفقات فهاد المديرية، خصوصا فضيحة بلوكاج السيستيم المعلوماتي لي فيه معلومات سرية على الشركات والمعطيات حول المستلزمات الطبية. كانت احتجاجات داخل هاد المديرية، وكانت اصوات كثيرة كطالب بحكامة جيدة، وكانت صراعات بين الشركات.

جزء من الاختلالات كشفتها تحقيقات “كود” ولي تسببات فتغييرات كثيرة داخل الوزارة.

يشار بلي المجلس الحكومي المقبل غادي يناقش خمسة مشاريع قوانين، يتعلق الأول منها بإحداث الهيئة العليا للصحة، والثاني بإحداث المجموعات الصحية الترابية، والثالث بالضمانات الأساسية الممنوحة للموارد البشرية بالوظيفة الصحية، والرابع بإحداث الوكالة المغربية للأدوية والمنتجات الصحية، فيما يتعلق مشروع القانون الأخير بإحداث الوكالة المغربية للدم ومشتقاته.،