كود سبور//
عبر عدد من النجوم السابقين للرجاء الرياضي من صناع إنجاز الفريق فسنة 2013 بالوصول إلى نهائي كأس العالم للأندية، على غضبهم من مسؤولي النادي برئاسة عزيز البدراوي لتجاهلهم وعدم دعوته لحضور حفل افتتاح أكاديمية الرجاء واللي كان يوم أمس الخميس، فالمقر ديالها بمنطقة بوسكورة نواحي كازا
ومن بين نجوم جيل مونديال 2013، وهو الجيل اللي كان التألق ديالو سبب فحصول الرجاء على قطعة أرض كهبة ملكية تبنات عليها لاكاديمي ديال النادي، اللاعب السابق للفريق ياسين الصالحي واللي ما ترددش فاعلان الغضب ديالو لعدم توصله بدعوة لحضور حفل الافتتاح.
ونشر ياسين الصالحي سطوري فانستغرام قال فيه: “حشومة يكون تجاهل الناس اللي ساهمت فديك المفخرة ديال أكاديمية الرجاء من بعد سيدنا الله ينصرو حنا رجاويين وفرحانين بهذا النهار ولكن كيبقى فيك الحال فاش بتشوف أن ناس كيتجهلوك بالرغم من داكشي اللي قدمنا وكان واجب علينا والله يوفق فرقتنا هذا العام”.
ياسين الصالحي لم يكن الوحيد من جيل مونديال 2013 ، اللي تقلق لعدم حضور افتتاح أكاديمية الرجاء، النجم السابق ديال الفريق مجد الدين الجيلاني حتى عبر على الغضب ديالو حيث المسؤولين فالرجاء ما عرضوش عليه وقال على فيسبوك: “تقافة الاعتراف …… اخلاق وعادات وتقاليد الناس الكبار فكريا ومعندهمش عقد نفسية اتجاه الاخرين وشبعانين من الاصل من غير الكورة و كذلك جزء من الشخصية القوية والنية الصادقة والنبيلة لأصحابها اتجاه الاخرين وليس أشياء أخرى”.
وتابع الجيلاني: “شكرا خاص للجماهير الرجاوية العريقة على الدعم والمساندة والجماهير المغربية، شكرا للملك محمد السادس على الهبة والهدية الجميلة للرجاء ونسأل المولى عز وجل ان يبارك له وتكون له في ميزان حسناته، شكرا لجميع الأطر الإدارية والفنية واللاعبين بمونديال/2012/2013 بطولة وكأس و لي عطات فرصة كبيرة لناس اخرى لإستكمال المهمة والتواجد الان داخل الرجاء، وشكرا لرئيس الجامعة على الاهتمام وهذا ليس بغريب عليه.
وختم الرجاوي السابق الكلام ديالو وقال: “ومن هذ المنبر كنقول الظروف كلها مناسبة الان فالرجاء باش تخرج لاعبين من طراز عالي انشاء الله تعالى شريطة تحيد المحسوبية داخل الفريق فالمدربين واللاعبين ومايبقاش طليب وتكون الكفاءة والجودة عالية”.