هشام اعناجي كود الرباط//

المسبح الكبير بالرباط، أو مسبح “الشعب” الأول افريقيا، لي كولشي يقدر يدخل لو والثمن رخيص تحدد 10 دراهم، “كود” حاولت تكشتف الأجواء داخل هاد المسبح.

بين “البيكيني” العصري لي هو اصلا لباس العومان، وبين ملابس دخيلة على ثقافة المغاربة من قبيل النقاب والبوركيني.

الأغلبية كيف شافت “كود” مع البيكيني والنشاط والموسيقي، وكيبقاو صحاب النقاب أقلية، وهما أقل بكثير من 1 في المائة من ناس لي كيجيو يعومو. غير هما بداو كيبانو. كيف وقع فشواطئ المغرب اللي لبسات النقاب والبوركيني تدريجيا حتى ما بقاوش لبنات كيلبسو البيكي الا فليبلاج بريفي.

11:30.. 3 محطات مراقبة قبل الدخول

مراقبة شديدة، على مشارف وجنبات المسبح الكبير، عيون الحموشي (رجال ونساء الأمن) تراقب الداخل والخارج، البق ما يزهق.

“كود” كانت في عين المكان، حيث خضع الصحفي لتفتيش محفظته. كيف كيخضع كولشي للتفتيش.

المواد لي ممنوعة من الدخول هي زجاج ومواد قابلة للاشتعال، ومواد تقدر تضر بناس. دوك المواد كيف عاينت “كود” كيتم الحجز عليه.

من 10 د صباح تال 8 د ليل اراك العومان والنشاط، هادشي لي مكتوب ف اللوحة لي معلقة ف واجهة المسبح.

الثمن زوين ولكن خاص النظافة

أغلب المصطفين لي تلاقاتهم “كود” كيفتخرو بهاد المسبح الكبير وفرحانين به، خصوصا القادمين من حي يعقوب المنصور والقامرة والدواوير المجاورة، جاهم ثمن مناسب.

الآراء ديال هاد ناس كتقول بلي هاد التجهيزات كاملين خصهم يحافظو عليها.

مريم 16 سنة، عجبها الحال، قالت لـ”كود” :”خاص غير يحافظو على هادشي دوش زوين لي طواليت نقييين الثمن رمزي”.

يونس كيقول تا هو ل”كود”:”لبيسين زوين وولاد الرباط خصهم يحافظهو على النظافة وديما الجيش الملكي”.

الشفرة.. البق ما يزهق

“جوج بعالك” عاد شديناهم قيطي، كيف قال أحد العاملين في المسبح لـ”كود”، كيعاود كيفاش تشدو جوج باقين قاصرين كيحاولو يسرقو ناس وسط المسبح.

“كود” عاينت طرد هاد جوج من المسبح، حيث لقاو راسهم قبل ما يحطو يديهم على حوايج ناس وفلوسهم، لقاو روسهم بين يدي العاملين والأمن الخاص لي بدورهم سلموهم للأمن لي مكلف بحماية المصطفين.

النقاب والبوركيني والبيكيني.. الأقلية والأكثرية

بين ثنايا هذه اللوحة الجميلة التي تبلغ مساحتها 17 ألف متر مربع، تدور حرب “قيمية” بين المحافظين والمؤيدين للحداثة والعصرنة، باختصار بين “البيكيني” و”البوركيني”.

في هذا المسبح، الاكثرية لا تبالي بهذا الجدل، لكن من خلال جولة “كود” يتضح أن اللباس الأكثر انتشار بين النساء هو البيكيني، في حين لباس البوركيني يقل أكثر عند الشابات.

الاختلاط في المسبح مازال ما وصلش للمرحلة الصداع. حيث العدد ديال المراقبين أكبر بكثير مما نتصور، أكثر من 110 معلم سباحة، إضافة العشرات من المراقبين، الذين يطوفون المكان.

لا مجال للتحرش، ولا مجال للأفعال الصبيانية، يقول مسؤول في وزارة الشبيبة والرياضة مكلف بالمراقبة ل”كود”.

لكن بعض الألبسة تثير تخوف، من قبيل “النقاب” الأفغاني، بحيث أن الغريب أن إمرأة بلباس افغاني كتجي بوليداتها الصغار وبنات صغار بلباس بيكيني باش يعومو تما.

هادشي كيفسروه المسؤولين على المسبح بالتأكيد أن المغرب ماشي هو فرنسا باش يمنعو النقاب والبوركيني، وكيقولو بلي من باب احترام الحريات راه لي لابسة النقاب والبوركيني من حقها تعوم ولكن ف نفس الوقت عيون امنية الكترونية وبشرية حاضية كولشي.

قصة 10 دراهم.. ومطالب بـ”فابور”

المغاربة عزيز عليهم “الفابور” لي تلاقاتهم “كود” كيفتخرو بهاد المسبح، وكاين لي قال بلي راه مشروع ملكي يعني خصو يكون فابور.

باغين فابور، وهادشي فاش سولنا ناس الادارة كيضحك بالقول : فتصريحو ل”كود” “واش هادو باغين يحمقونا حنا كنخدمو بليل وبنهار وعندنا شهرين غير باش نسهرو على راحتها وهوم باغين فابور”، مضيفا :”10 درهم غير ثمن رمزي وسيدنا كتهمو الفرحة تعم هاد الناس البسطاء لي كيجيو ينشطو كاينا موسيقى”.

وفي هذا الإطار كيشرح هادالمسؤول لـ”كود” قصة تخفيض ثمن المسبح من 20 درهم تال 10 دراهم، بالقول :”كان تدخل صاحب الجلالة باش يردوه 10 دراهم وهذا مكان”.

وأضاف المسؤول نفسه بأن هذا المشروع يأتي في إطار أوراش مشروع “الرباط مدينة الأنوار”، الذي يهدف إلى تحديث عاصمة البلاد وتعزيز مكانة المغرب باعتباره وجهة سياحية.

البحث عن صورة الملك اللي خلى البيسين ب10 دراهم

المسؤول عن المسبح الكبير غير متواجد بمكتب إدارة المسبح الكبير بالرباط الذي يستقبل الآلاف من الرجال والنساء والأطفال بشكل يومي.

السبب علاش محاضرش، هو أنه مشا يجيب صور الملك، لي غايبا عن المكان كيف عاينت “كود”.

“لقد ذهب لجلب صور الملك محمد السادس ليتم تعليقها في الأماكن المهمة في المسبح” يقول مصدر من الإدارة.

5000 مرتاد.. الحد الأدنى

5000 تذكرة حد أقصى ديال المبيعات ف الكيشي لي حدا الباب، يوصلو 5 آلاف يوقفو التوزيع.

هاد اليومين لي كانت الحركة مزيان، المبيعات فايتا أكثر من 3000 تذكرة كاين اقبال يعني الفلوس كادخل مزيان.

ثمن تذكرة 10 درهم، يعني أقصى ثمن يمكن يدخلو المسبح فاليوم هو 50 ألف درهم.

مول “البيكالة” خسر صورة البيسين

ورغم هاد الإمكانيات الهائلة لتوفير الخدمات اللازمة للمستفيدين، منها 60 عون حراسة و 140 مدرب سباحة و 50 عاملة نظافة، وقعت حادثة صادمة، هي التصرف لي دار واحد الشاب فاش سبح بالبيكالة.

هادشي خلا المسؤولين يكعاو ويمنعو إدخال الدراجات وكل ما من شأنه يعرقل الراحة ديال المصطفين.

كما أطلق عدد من نشطاء ساكنة الرباط نداءات لكافة مرتادي المسبح الكبير للرباط، باحترام القوانين المنظمة للمسبح، والحفاظ على تجهيزاته ونظافته، لضمان استدامة خدماته.