كود هناء ابو علي ///

من نهار لاربعا 15 يوليوز بحال “لارام” وهاديك الشركة الاماراتية اللي مولاها وهابي ومدخل معاه لمغاربة وسميتها “العربية” تجيب فرحلات استثنائية شي مغاربة. عقلتو على تخلف وزير الخارجية والتعاون ناصر بوريطة فالتواصل. اللي دار كثر من 7 الخرجات من بيانات وحوارات باش يشرح هاداك البيان الغبي على شروط العودة وشكون يرجعو. 

المهم كان من شروط العودة تجيب تيست “بي سي ار” فعمرو قل من 48 ساعة وتجيب تيست سيرولوجي. كل دولة وكيفاش وجدو هاد الشي. فاسبانيا كانو قناصلة مع السفارة اللي خدمو ودارو اتفاقيات واخا شفوية مع شي مختبرات باش يكون التيست فهاداك الحيز الزمني ديال 48 ساعة وكاين اللي دار مجهود كبير وقدم يقنع شي مختبرات بحال اللي وقع فلاس بالماس باش يديرو التيست بجوج غير بشي 22 الف ريال٬ فمناطق اخرى وصل لاكثر من 44 الف ريال اييه 2200 درهم. 

هاد التيست رحلة عذاب حقيقية كان “كود” عاوداتها ليكم. تسخسيخ وحريق عصاب وووو زيد على هاد الشي ديك “بي سي ار” ديزاگريابل. يخليك تكره راسك. كاين اللي كيعبجو وكاين اللي جاه خايب صعيب مزعج مقود. دابا جمعو هاد الشي كولو. الجري على التيست والاحساس باش ديرو وتقلاب على تذكرة لارام وكاين اللي مشى من مدينة لمدينة حقاش فاللول كانو دايرين فاسبانيا مثلا غير مدريد ومالقا رحلة فالسيمانا وبرشلونة قبل ما يزيدو من بعد لاس بالماس وما كانوش فاللول الوكالات كيقدرو يديرو ليه الحجز. فهاد الظروف كان التسخسيخ علي حقو وطريقو.
التيست اللي بغيتي ديرو تقدر تسنى فكلينيك جوج سوايع. غادي تلاقى مع مغاربة بكاع انواعهم.

كتوجد هاد التيست كتعذب اش يكون عندك وتقدر تركب فطيارة. كتجي للمطار شي 4 سوايع الى 3 سوايع ونص قبل. كتلقى صف طويل. الناس جاية قبلك. تسنى نوبتك. كرحلة مالقا كازا البارح الجمعة كانت التسنية. كتجي نوبتك. طبعا كاين اللي كيجي معطل حقاش عندو بيزنس كيف راجل مريم بنصالح وكيلقى بلاصة “بريميوم ..” عامرة، كيمشي يسول شي حد بحال شي حد ما راضيش. ومن بعد كيدير الصف. كون هنا فالمغرب غادي يعيط فالتلفون. تماك ما خدامش. شي وحدين من صحاب البيزنس كبار فالسن باينين شفرو فالمغرب حتى عياو وهربو منو وشراو شي فيلا فالوسطا ديل صول٬ هادو كيديرو يشوفو فشي وحدين وراهم وحسو بيهم ماشي من طبقتهم٬ بقى ليهم غير يعيطو للبوليس. الحقد الطبقي بالمقلوب كيخرج من عينيهم. يعني كيقولو اش كيدير معانا شعيبة. سيرو فحالكم.

هاديك اللي فالكونطوار هاد الشي جديد عليها. كتطلب الباسبور وكتشوف من بعد كتسولك فين هو “بي سي ار” كاين اللي طبعو وجابو وكاين اللي رسلو ليه لكلينيك ووراه ليها فتلفونو. هاديك السيدة كتشوفو مزيان وتقراه. كلمة “سلبي” هي المفتاح. كتقارن بين اسمك فالتحليلة واسمك فالباسبور والرقم والساعة اللي درتيه فيها… 

كتعطيك لبلاصة ديالك بعد ما تدفع الباگاج. وباش تسولها علي هاداك التيست سيرولوجي كترد عليك “ما محتاجاش نشوفو انا. هادوك طالبينو لمغاربة. باش توصل غادين يطلبوه”

الرحلة ماشي طويلة. فيها كتسمع قصص مغاربة اللي كتسمعها ايلى ركبتي فكار او تران او طاكسي. هادي مع الغربة كتكون فيها الزيادة. هادي وحدة تلفات فالمطار ومقلقة علاش ما لقاتش ناس القنصلية يوريوها الطريق. تصورو روتريتي خدمات فبلادها وقررات تقلب على نهاية عمر سعيدة ومشات لكوسطا ديل صول وباش طلعات وهي كتسب فهاد المغرب اللي جاياه. القنصلية ما عندهمش الحق يدخلو للمطار الداخل. ولكن هي تلفات كتعاود فالتلفون وكتسب. جا حداها واحد من مارتيل. جبد معاها الهدرة علي عائلة العسري. شاف الستيورات وهو يغوت: الما يا خاي الما”. مع شي وحدين گلبهم طايب. هاديك لمرا روتريتي وهي تقول ليه “كنت معاهم فالحج كيفرقو علينا الما بالكاس وناس الخليج كيجيبو لينا الما والعصير. طبعا باش عاودو طلبو الما لاكثر من ستيورات واحد رد عليهم بادب: حتى تطلع الطيارة” وهو يرد عليه ولد مارتيل: يا على اسلوب شفتو كيفاش كيجاوب”. عالام وصافي.

فالطيارة كاين اللي كيهدر باش يسمعو كلشي بحال واحد كان بارك فالصف 11. هادا جاي من اشبيلية وكيفتاخر انو اتصل بالقنصل ديال الخزيرات وعاير ليك بوه وامو حقاش طلب منو شي وثيقة وباش قالو ليه رجع لاشبيلية وخودها وهو يسبو ويقول ليه كيف كان كيشرح لشي مرا فالتلفون “واش حنا يهود. ياك كاع مغاربة”. بعد ما قال باللي سب القنصل زاد “غادي ندير ريكلاماسيون بيه ونتاصل بالسفيرة باش يتعلم”. هاد المواطن غير ععلى ديك المعيور اللي قالو فالتلفون خاص القنصل يقدم بيه شكاية.

فالطيارة غاديين يفرقو ديك الوثيقة ديال فين كتني وفين غادي ووو فيها معطيات امنية واخرى عندها علاقة بالصحة. واش كان عندك الحرارة واش كنتي فشي صبيطار فيه كورونا فيروس…..

حتى لدابا كتقول لمغاربة مزيان. كلشي عندهم ناضي. وصلات الطيارة. كيخرج بالصف بالصف. هادي مزيانة ما بقاش ديك الفوضى كلشي واقف اللي كانت قبل كورونا فيروس. الناس بدات تخرج. كتقرب لواحد جوج صفوفا منظمين٬ كيخرج واحد كيبدا يخبر المسافرين اللي وصلو “كلشي يخرج التيست ويديرو فيدو” واللي عندو فالتلفون؟ كيرد هاد السيد “جبدوه ووجدوه. راه الطبيب غادي يراقبو”.

كنا 4 ولد صغير عندو 6 سنين معفي منو و3 كبار. وصلنا عند الطبيب. مادار حتى حاجة. وريناه فالتلفون هادك التيست. ما قراه ما حقق فيه ما والو. والو والو. اما داك السيرولوجي بلا ما نهدرو عليه. اييه الطبيب فمطار محمد الخامس ما راقب والو. توريه من بعيد اي حاجة ويقول ليك دوز. غريب هاد الشي. كيصدم. كيفاش طبيب ما دايرش خدمتو بحال باقي الخدمات تماك من امن وجمارك ودرك…. حدا الطبيب بنت معاها كاميرا لقياس الحرارة. حتى هي كتشوف فيك. حاطين الماتيريال ديكور وصافي

وهاد التيست اللي تعذبو عليه لمغاربة كيفاش ما كيشوفوش هاد الطبيب. صدمة كانت كبيرة عند هادوك اللي طلعو ونزلو وخسرو لفلوس علي والو. وزارة الصحة مع هاد الوزير مستمرة فالتخربيق. 

مع البوليس كيسولوك علي الورقة اللي عطاوها ليك تعمرها فالطيارة٬ وكيدير خدمتو وكتخرج. 
لبلاصة الوحيدة اللي كانت فيها مراقبة حقيقية لتيست واحد “بي سي ار” كانت فالكونطوار ديال لارام فمالقا. من بعد كاين غير دوز دوز دوز. الطبيب يمكن خايف. 

وانت كتخرج من المطار كتكتاشف واقع اخر. لكمايم. شي دايرهم وشي مزوق بيهم عنقو وشي محيدهم كاع. من المطار حتى الدار. هاديك اجبارية الماسك غير اشاعة وصافي. 

فالمغرب كاين القانون. دير تيست دير الكمامة وكاين الواقع. طبيب ما كيشوفش التيست والمغربي ما بقاش مسوق للكمايم