سهام البارودي – كود//

لابغيتي تفهم ثقافة بزاف ديال المغاربة تقدر تراقب غير تصرفاتهم فالصوگان، و غايبان ليك الكائن الفوضوي لي فيهم ! عدم احترام القانون، التغوفيل، الزربة، الفساد، احتقار المرأة …. هادشي كلو لاكنتي توريست ماتحتاج يگولوه ليه فلوروتار ! و لا كنتي مهتم بالظواهر الاجتماعية و لا كاتوجد شي دوكتورا فعلم الاجتماع الحل ساهل، كري طوموبيل و تسركل بيها شي نهار فكازا و غايبانو ليك هاد النقط:

1- ماكاينش بعد نظر فالحياة ! و نفس الشيء فالصوگان ! اغلب المغاربة كايعيشو النهار بنهارو! كايتجوجو واخا ماقادينش على الجواج ! كايخدمو فأيتها خدمة باش يديبانيو ! كايولدو الولاد واخا ماقادينش بيهم و كايگولو ديك كولا يتزاد برزقو ! حتى كايحصلو عاد كايبداو يبكيو واك واك بغينا سيدنا يجي يفكنا ! بغينا الحكومة تتدخل … نفس الشيء فالصوگان المغربي ماعندوش بعد نظر ! عارف راسو غايدور على ليمن و وواخا هاكاك ماغاديش يروم ليمن على بكري ! لا تايبقا فليسر تال الدقيقة تسعين و يبغي يقطع الطريق على عباد الله.

2- كايشوف المرا كائن ضعيف ! ناقص ! فالحياة بصفة عامة كاتلقاه باغي يدير فيها راجل على مو و ختو و صاحبتو و مرتو واخا يكون هوا ماكايسوى تا بصلة ! و لكن حيت ” راجل” كايعطي لراسو الحق يحط ترمتو فوق ريوس العيالات ! و هادشي كايبان تا فالصوگان ، المغربي غير كاتبان ليه مرا دايرة مع شي رومبوان كايبغي يزرب عليها و يدوز هوا ! كاتبان ليه جاية من شي طريق و هوا خارج من شي زنقة و عندو قف كايكسيري باش يغوفل عليها و ديما كاتجيه غا زايدة ناقصة فالفضاء العام ” السوگان ديال العيالات” ” هاي هاي على القحاب تاهوما كايسوگو” مكرهش هوا يسد عليها فالدار باش يبقا غا هوا لي كايدور براسو كي الطارو د نيدو وسط الشوارع !

3- ديما زربان و ماعندوش الوقت و هوا ماكايصنع تا قلوة فحياتو ! كاتلقا شي مغربي ضاراه الضرسة سنين و منين و ماباغيش يمشي يحيدها عند الدونتيست و يحل المشكل ديالو و لا كاتلقا عندو شي ساقطة خاسرة فالدار و سامح فيها و هانية ! و لا شي روبيني كايقطر و مخليه يقطر مايجيبش بلومبي ! و لا كاتلقا الطبيب ناصحو يدير الرياضة و ماكايديرهاش و فاش كاتسولو علاش ؟ كايقوليك ” ماعنديش الوقت” فحالا كايظل واقف على المفاعلات النوووية و هوا كايدوز وقتو كامل فالحزاق و السريط ! ” ماعنديش الوقت” هاد المغربي بالضبط هوا لي كاتشوفو جاي كايطير من وراك و كايطلق فالفار على عباد الله و يضوبل هادا على ليمن و يضوبل لاخر على ليسر فحالا كايلعب بلاي و فاللخر كايوقف فحالو فحال عباد الله فالفوروج! و لا كاتلقاه هاد الزربة كاملة دايرها باش يمشي ينشر قلاويه فشي قهوة ! و هاد الزربة كاملة لي دايرة كاتلقاها باش تمشي تحط زكها فوق شي سداري و تبدا تكتب up up up فگروبات الحزاقات فالفايسبوك

4- كايتشكى من الفساد و هوا بكرو اصل الفساد ! فالحياة المغربي كايآمن بلي الذكي هوا لي ماكايطبقش القانون و كايعرف يسلت منو ماشي هوا لي كايطبق القانون ، حيت فالتباطين ديال مخو القانون غا زايد ناقص ! غا شي حاجة دايراها الدولة باش ديرونجيه فالبدائية ديالو و تصعب عليه معيشة الادغال لي باغي يعيش ، دونك فوقما قدر مايطبقش القانون ماغايطبقوش ! بان ليه شي سطوب و ماكاينش البوليسي غايدوز فيه ! عارف شي آنتيردي و الليل و الطريق خاوية غايدوز فيه ! كاين الفوروج و لكن ماواقف حداه تا بوليسي غايدوز فيه ! حافظ الرادارات فين كايكونو و كاينقص السرعة تاكايوصل ليهم !