الرسالة الأولى للمغنيين المغاربة خصوصا هادوك لي طلاونا بالأغاني مؤخرا :خودو العبرة من البولماني و خلقو ” التميز” فحالو راكم عيقتو علينا بالكوبي كولي ! خاص المغني فيكم يلقا الستيل ديالو و يبدع فيه عوض ماتبقاو شي ينقل من شي ! راه ماشي أي واحد فيكم يقدر يقلد ايمن السرحاني ! و ماشي اي واحد فيكم يقدر يقلد سعد المجرد ! و ماشي الفنان لي نجح بشي ستيل و صدقات ليه يبانو لينا عرام ديال الإمعات تابعينو باغين يقلدوه و يديرو فحالو !
راه مابقاتش ف” جبتو ” و أح أح أح ” و دوك التواشا الحامضين ! راه بقات فواش كاين شي ابداع و لا لا ؟ واش أغنيتك كاتوصل للقلب و لا لا ؟
سيد نبي براسو قالكم ” لا تكونو إمعات”
الغناء قبل مايكون أداء راه فن ! الكلمات كايلعبو دور و الكليب كايلعب دور و الصوت كايلعب دور ! و لكن الاهم من هادشي كلو هوا التميز، التفرد، لاسانگيلاغيتي ! حيت ماشي غير آجي و سمي راسك فنان خاصك تكون سيدي و مولاي قادر تخلق التميز بالستيل ديالك ! كاين شاب خالد واحد ! و كاين شاب مامي واحد ! و كاين عبد الحليم واحد ! و كاين السرحاني واحد ! و سعد المجرد واحد و دنيا بطمة وحدة ! گاع الفنانين الناجحين كايكون منهم غا واحد ! اي فنان كايقدر يخلق ستيل ديالو راه كايصنع ماركة مسجلة بسميتو ! فحال كوكا ! كاتبقا كوكا ! واخا تجي كوبس و فوبس و هوبس و لوبس و دير الكحولة ديال كوكا و السكر ديال كوكا و القرعة فحال ديال كوكا ! كاتبقا كوكا فبلاصتها و كوكس فبلاصتها !
البولماني لاكان خاص يتعلمو منو المغنيين الجداد شي درس ! راه هوا يتعلمو يخلقو و يبدعو و يصنعو شي حاجة آوت اوف ذا بوكس لابغاو يطفروه ! مع ديك المعاندة فأح و أح و جبتو راه كاينطابق عليها المثل ديال ” المعاندة فالحزاق تخري”.
الرسالة الثانية ! لي كاينة فالفيديو ديال البولماني و لي فرحاتني ! هي نشوف دوك الدراري فرحانين ! شباب ناشط و كايغني على الحب، تفكرت الدراري ديال التسعينات لي كانو كايتسنطو للراي ! و للشاب خالد ! قبل مايبان الجيل ديال ” عمرو خالد” جيل ” موسطاشات” و ” عنيبة” و ” طحاب” و ” تبي” …
الدراري لي فكليب البولماني راه ميساج للدولة ! بلي الشباب ديالها كايآمنو بالحب و بالفن و بالغنا ، شباب زوين ! ماكايمشيش يفرگع راسو فالرقة و لا فبشاور و لا فتورا بورا غير لاتسدو البيبان فوجهو و ظلامت الدنيا فعينيه ! الدراري لي فكليب البولماني رسالة للدولة كايقولو ليها فيها حنا زوينين ! باغين نبغيو و نتبغاو و تكون عندنا لي تبغينا ” ياو نموتو عليها ” … شوفينا كيف ناشطين من والو ! وا وقفي معانا آ الدولة و وفري لينا الخدمة و الكرامة و غانبقاو زوينين !
بصح أغنية البولماني ! أغنية بسيطة ! بوسائل بسيطة ! بكلمات بسيطة و لكن ليها الفضل فرحاتنا و سيفطات لينا رسائل مهمة !
خاص غير لي يعرف يقرا !