محمد سقراط-كود///

ديما فاش كتشد شي خلية إرهابية باقي مادارت والو وكانت باقا في مرحلة التخطيط، كتلقى بزاف ديال المغاربة كيشككوا في الأمر وكيعتابروها مسرحية أمنية باش يخلعوا المغاربة لا غير، و واخا كتوقع شي عملية إرهابية ويموتوا الناس وتبقى الأشلاء ديال عباد الله مشتتة في شي قنت كيبقاو ديما بزاف مشككين في الأمر، كنعقل على إنفجار أركانة كنت في مراكش ويالله سمعنا الإنفجار مشينا نشوفوا مع باقي جداد في هادشي دالإرهاب ماشي بحال العراق وسوريا وأفغانستان وباكستان ولبنان كيكونوا جوج إنفجارات اللول باش تجمع الجوقة والتاني في خاطر الفضوليين هو لي كيكون مدمر وقاتل كثر، الأجواء الصراحة كانت إحتفالية راه كان خاص شي علماء ديال النفس يديرو دراسة داك النهار على المغاربة، كولشي ناشط والناس كتصور فيديوات كيقلدوا فيهم مراسلي الجزيرة تاواحد مكان خايف بأنه يقدر يكون ضحية الإرهاب شي نهار والعديد كان مقتانع بأنها غير قالب باش يوقفوا الإحتجاجات .

حتى عقلاء عشرين فبراير ويا لنذرتهم أدمعوا داك الوقت على أن تفجير أركانة فعل مخابراتي باش المجتمع ياخد فكرة على إلى تربجات شنو غادي يوقع وشكون لي غادي يركب ليه فوق ظهروا، وكان بنادم كيقولها بكل يقين على أساس أن العقيدة والفكر الإسلامي المتشدد محتاج تبرير سياسي، بحال الى مكانتوش هادي سنوات وهوما كيتفركعوا ديما ويقتلوا في عباد الله، ولكن عموما المغاربة عمرهم تاقوا أو قتانعوا أنهم مستهدفين بالإرهاب بشكل شخصيـ أييه راه يمكن تكون غادي أو كالس في قهوة أو بار ويدخل واحد ولد بلادك كيشبه ليك في الشكل والوجه بجوجكم ضحية للهدر المدرسي ويقرر يتفركع في الزمر كامل، الفرق بينكم هو داز للخطوة التانية ونتا باقي متعايش مع تأنيب الضمير حيت كتضرب الطاسة وكتسنى النهار لي توب فيه وتبع طريق الله .

حتى هاد العملية الإرهابية اللخرؤة في حق شرطي حي الرحمة، فاش كانوا الإشلاعات حول أن مرتكب الجريمة بزناس ريفي وجاب العصابة ديالو ومعاهم ولد مسؤول كبير كيحميهم وباقي الخزعبلات لي تطلقات ولي تمعشوا منها صحاب اليوتوب، كانت بالنسبة للمتتبعين قصة منطقية أن بزناس لي أصلا خاص يكون ذكي باش ينجح يكون عصابة ويدير الفلوس ويعرف المونتيف لي غادي يحط فيه يديه، ينوض يغتال بوليسي ويحرقوا يعني من كان كيجري في عشرسنين دالحبس ويخرج يصرف رزقوا لوللى كيجري في إعدام، وفاش تشدو الإرهابيين لي نفذو العملية بداو الناس كيشككوا في الرواية الرسمية ومن نيتهم مرجحين أن الجريمة من فعل بزناس على أنها من فعل خلية إرهابية مبايعة لداعش لي سبقليهم دارو بحال هاد العمليات في العالم، راه أي مغربي مستهدف بالإرهاب خصوصا طاقم موقع كود لي سبقليه تكفر وإتهم بالإلحاد ومحاربة الإسلام والمسلمين من طرف الأمرد غلام أبو النعيم مول الفوقية حيت كاين لي كيحرض ويرجع اللور وكاين لي كينوض ينفذ بحال هاد الخلية لي وصفها الشرقي بالتطرف السريع، راه لي قاموا بالفعل لا يقلون خطورة على لي حرضوا عليه وخاص الدولة تجمع كولشي باش ما يضيعش الوطن في مغاربة خريين يمشيو ضحايا الفكر المتطرف.