عفراء علوي محمدي- كود//

اعلن سعد الدين العثماني، رئيس الحكومة، بللي الوزارات كتوجد مخططات لاستئناف أنشطتها الاقتصادية، كل وحدة حسب المجال ديالها، باش جميع القطاعات التجارية والصناعية ترجع تخدم من جديد، وبشكل تدريجي، فزمن فيروس كورونا المستجد.

العثماني وضح، فلقاء ليه فصفحة حزب العدالة والتنمية ف”فيسبوك”، لبارح الجمعة بالليل، أن هذ القطاعات ممكن تشمل المقاهي والمطاعم، والمعامل اللي كتصنع مواد كيتم تصديرها بحال قطع غيار السيارات، ثم وكالات القطاع السياحي اللي ضروري خاصها تبدى فاللول بإنعاش السياحة الداخلية.

وشاف رئيس الحكومة أنه ماشي فتح الأماكن اللي فيها التجمعات البشرية هو اللي صعيب، “لكن حث هذ القطاعات على الالتزام بمعايير الوقاية الضرورية واستعمال الكمامة والمطهرات، وتدبير التجمعات وتقنينها هو اللي صعيب”، على حد قولو.

وكشف أن مجموعة من المعامل بدات تحل دابا شوية بشوية، وتأسف لأن مجموعة منها مازالة سادة خوفا من كورونا، واخا وجودها ضروري.