25/04/2024 19:30
أصلا خصو “التجريم” فالقانون الجنائي. القضاء انتصر للقانون ضد الأعراف والتخلف السلفي وحكم بالسجن لراجل تزوج بطفلة فدوار بإقليم وجدة
سامي العلوي -گود كازا //
كشفات مصادر ديال “گود” ان عدد كبير من رؤساء الجامعات في المغرب كينسقو بيناتهم فهاد الاسبوع باش يديرو العصا فالرويدة للوزير ديالهم عبد اللطيف الميراوي لي كان حتى هو قبل ميولي وزير رئيس ديال جامعة القاضي العياض.
وعلى حساب مصدر “گود” جاو الندوة الصحفية لي دار وزير التعليم العالي والبحث العلمي والابتكار غير 5 ديال رؤساء الجامعات من اصل 22 لي كاينين، هاد الشي كيبين ان النقابة ديال رؤساء جامعات المغرب باغي يريبو للميراوي ذاك الشي لي ناوي يديرو في الوزارة.
رؤساء الجامعات كلهم تلقاو دعاوى خاصة من الوزارة باش يحضرو ورغم هكاك دوروها تلفونات باش ميحضروش ويتحالفو ضدو خايفين يوقع لشي واحد فيهم ما وقع لرئيسة جامعة الحسن الأول فسطات لي معطلهاش الوزير مباشرة فملف الجنس مقابل النقط، وزيد عليها توقيف رئيس جامعة سيدي عبد الله بفاس.
وعلى حساب مصدر خاص تكلم ل”گود” ان من بين المشاريع الجديدة لي كيدافع عليها الوزير الميراوي وباقي مخرجهاش وهي الاستراتيجية الجديدة والمعايير الصارمة في انتقاء واختيار رؤساء الجامعات الجداد بعيد على منطق “عطيني نعطيك” لي كانو كيدوزو به عدد من عمداء الكليات ومدراء المدراس ورؤساء الجامعات.
وكيتسناو الرؤساء المقاطعين لندوة الوزير رد فعل الوزارة باش بناء عليه تكون تصعيدات أخرى.
