الخطابات المتطرفة قلقات بزاف الحركة النسائية: وزارة الأوقاف تتحمل المسؤولية ورئاسة النيابة العامة خاصها تحرك الدعوى العمومية
سهام البارودي – كود//
كل عام من الفين و ثلاتة و السلفيين المغاربة كاتزاد فيهم نغزة ! فالأول كانو داخلين سوق راسهم حيت عارفين راسهم شنو دارو و عارفين بلي الخطابات الظلامية ديالهم هي لي وصلات البلاد للارهاب الدموي لي ماتو فيه بزاف د المغاربة ! و لكن عام على عام يصحابهم نسينا و كايحاولو يخرجو من الجحور … عام على عام حتى وصلنا لليوم
فذكرى احداث سطاش ماي الارهابية ف 2022 السلفيين باغين يزورو التاريخ ، يصحابهم نسينا ! شوف الوقاحة و قصوحية الوجه كي دايرة ! الناس كايبكيو على الضحايا و حتى اللحايا كايبكيو قاليك على الضحايا و لكن آطونسيون ماشي نفس الضحايا ! هوما كايبكيو على دياولهم لي تشدو فحبيبيس مورا الاحداث ديال سطاش ماي و كايوجهو تهم للدولة المغربية و للقضاء المغربي و باغين يصورو راسهم على انهم مظلومين !
ايوا ملّي نتوما مظلومين آ ولاد القحاب و الضحايا مظلومين شكون الظالم ؟! شكون ؟! شكون لي اجج الخطابات الظلامية و شكون لي زرع التفرقة فنفوس المغاربة و شكون لي جاب ليها الخطاب السلفي الوهابي لبلادنا ؟! ياك نتوما !؟ ياك درتو ” مراجعات” ايوا ملي نتوما مظلومين علاش تراجعتو ؟!
وا لايني هاد الناس ماكايحشموش ! ماعندهمش المراگات ! عام على عام كايبغيو يلبسونا ! ياكلونا ! حتى من التاريخ بغاو يزوروه ! و هاذا غير التاريخ لي قريب و لي كلنا حضرنا ليه ! يعلم الله آشنو زورو جدودهم و شيوخهم قبل !
هادشي راه خطير و خطير بزاف ! باش المتزعمين للخطاب الظلامي فالمغرب يخرجو لينا اليوم و يقولو على راسهم ضحايا و يتاهمو الدولة و القضاء بأنهم ظلموهم ! باش شيوخ السلفية الجهادية فالمغرب يتنكرو للمسؤولية الجسيمة ديالهم عوض انهم يتحملوها و يعتاذرو على الدم لي سال بسبابهم ! عوض انهم يحنيو يبوسو رجلين عائلات الضحايا ! كانشوفوهم هازين نيوفهم للسمّا و كايتبجحوا بأنهم هوما الضحايا ديال سطاش ماي ! كاينة شي قصوحية الكمارة اكثر من هادي ؟! هادي اهانة كبيرة لضحايا سطاش ماي و لعائلاتهم !
المجرمين ديال البارح كايبكيو اليوم ! كلاو مع الذيب و بغاو يبكيو مع السارح ! ايوا الله ينزل اللعنة على الكذاب!