نجوى المالحي -كود//
عبد الصمد بنعلة، لي كيقدم راسو كطبيب باسم “دوك صمد” هو حديث مواقع التواصل الاجتماعي من البارح في الليل بعد قضية الفيديو اللي لابس فيه ملابس نسائية وداير البيروك والماكياج وكيغني على أنغام وائل جسار.
دوك صمد حر في الاختيارات ديالو هادي لا نقاش فيها وهادي هي الخلاصة لي خرج بيها بعدما نكر في الأمر وقال أنه ماشي هو، ومو بعد خرج قال في فيديوهات حطها على انستگرام الشخصي ديالو، أنه حتى واحد ماسوقو فيه.
السؤال لي بزاف ديال الناس طرحوه هو “علاش حتال دابا؟”، علاش ماعلنش على المثلية ديالو من قبل وكان ديما ناكر؟
مصدر مقرب من عبد الصمد قال لـ “كود”، أنه هو ماختارش يحط داكشي وانه وقع في خطأ، عوض يرسل الفيديوهات لي دار لشخص محدد وقع لي وقع وولى داكشي للعموم، والفيديوهات دارو بوم وولا هو حديث الصغير والكبير.
وفي قضية أنه ناكر من ديما، قال مصدر كود أن المقربين عارفين الوجه الثاني ديالو، لكن هو خلا الشخصية الأنثوية لي فيه مخبية باش يفرض شخصيتو ك”طبيب” ويكون عندو زعما الكلمة، حيت المجتمع ديالنا ماكيرحمش.
الحاجة لي خاص نآمنو بيها كاملين أنه حر في ميولاتو، وان كل واحد منا مخبي شي حاجات على العموم. وفي 2019 خاص نتقبلو الاخر بلا أي مشكل.
