سهام البارودي – كود//

أنا من ديما كانقول بلي الراديو المغربي أغلب البرامج ديالو و لي عندها اوديطوار كبير مرتع للافكار الظلامية و الافكار التقليدية و كايساهم فتكليخ ربات البيوت و الشيافرية لي كايظلو طالقين الراديو باش يشقاو و لا يشدو لوطوروت ! البرامج الناجحة فالراديو اغلبها مامديوراش باش تخلي الناس تفكر و تتسائل و تخدم دماغها لا و تغير افكارها بافكار تساير العصر ! اغلبها مديورة باش تكرس واحد النظرة تقليدية للمجتمع و لي شد شي ميكروفور كايبقا جيب يا فم و گول كايسرسب علينا فالافكار ديالو و التجارب ديالو و الاستنتاجات ديالو فحالا جالس فبيت النعاس ديالو كايتعاود مع المدام ماشي فراديو.

مؤخرا واحد سميتو معتوق خرج كايخاصم فشي برنامج قاليك علاش المراهقين الذكور المغاربة مابقاوش حورش ؟ و علاش البنات مابقاوش فيهم صفات الانوثة ؟ علاش ماكايلبسوش حوايج الرجال و حوايج العيالات ؟ و شي هضرة ديال شي واحد ماباغيش يقبل التطور المجتمعي لي طاري قدّامو و يفهم أنه اللبس ديال المراهقين و الشكل ديالهم و التعامل ديالهم مع اللباس راه مسألة زمان و مكان كاتبدل و غاتبقا تتبدل على مر العصور حيت خاضعة لبزاف ديال المعايير من بينهم الموضة و الاعلام و الفن و الاسرة و التربية و زيد و زيد تال سيدي  بوزيد ! من غير المعقول انك تطلب من المراهقين ديال 2022 يكونو كايشبهو للمراهقين ديال التسعينات لي كانو مربيين الشعر و كايتصنطو لمامي ! او لمراهقي الثمانينات لي كانو مجرجرين الباط ايليفون فالارض و كايتصنطو للبوني ايم ! و الى كانت الذكورة كاتقاس بالنسبة لمعتوق بالحروشية راه هوا براسو كون ركب فآلة الزمن و رجع بشي خمسمية عام لور وسط شي قبيلة مغربية كان غايجيهم ماحرشش بديك التشويكة و ديك اللحية مكرطة و الموسطاش مكرط و اليدين رطبين ….

و اصلا اصلا ماسوقوش فيهم ! باركا من الوصاية على عباد الله ! شكون هوا هاد معتوق اصلا لي باغي يلبس ولاد و بنات المغاربة على ذوقو ؟ يدخل سوق راسو و يحتارم الحرية الشخصية ديال هاد الوليدات و باراكا ماتحملوهم اكثر من طاقتهم! كايبقاو يشارجيو الاطفال بدوك الافكار التقليدية الهدامة ” نتا راجل ماتبكيش” “نتا راجل ماخاصكش تخاف” “نتا راجل خاصك تضارب ” ” نتا راجل خاصك تحكم فمراتك” حتى كايخرجو لينا اجيال ديال الرجال العوجين عامرين عقد و امراض نفسية و عقلية و مشارجيين بالعنف و الكراهية للآخر، كايعرف غا يضرب مراتو و يضارب مع الجيران و يهرس الكراسا فالطوبيس و يبول فالزنقة و يحرك قلاويه حدا شي بوطو و يشد شي بنت بزز باش تعطيه النمرة و فاش تسولو يخرج فيك عينيه و يقوليك ” أنا راااجل”.