عفراء علوي محمدي- كود//

دارت وزارة الصحة دورية جديدة موجهة للمديريات الجهوية، بخصوص تعديل فالبروتوكول الصحي المعتمد بالنسبة للسفر الدولي.

ودابا، غيتم الاستغناء على الحجر الصحي فالفنادق بالنسبة للمغاربة اللي جايين من دول اللائحة “ب”، وغيتم تعويض هذ الإجراء بالحجر لمدة 5 أيام فالبيت، مع إجراء اختبار كورونا فاليوم الخامس، وهكذا الحجر كيسالي إلى كان التيست نيكَاتيف.

وحسب دورية وزارة الصحة، اللي اطلعات عليها “كود”، فالإجراءات المشتركة اللي خاص يديروها المواطنين اللي جايين من بلدان ليست “ب” و”أ” هي: تعبئة استمارة الراكب الصحية، اللي كيمكن تحميلها قبل السفر، ولكن كتكون كذلك فالباطو والطيارة، واللي كتشمل معلومات على الراكب، وجوج ارقام هاتفية ديالو، باش يتم تتبعو، إذا اقتضى الحال، فالعشرة ايام ديالو اللولة فالمغرب.

وبالنسبة للناس اللي جايين من دول اللائحة “أ”، يكفي يدليو بشهادة أنهم تفاكسيناو طوطالمون، (باسترازينيكا أو سينوفارم أو سبوتنيك أو فايزر او جانسن او كوفيد شايلد، أو موديرنا، او سينوفاك)، او يعطيو نتيجة سلبية لتيست PCR مديو فاقل من 3 أيام على السفر.

اما الناس اللي جايين من دول اللاىحة “ب”، خاصهم يعطيو شهادة التلقيح الكامل وتيست PCR سلبي دار فاقل من 48 ساعة قبل السفر الى كانو ملقحين، والى لا يديرو تيست PCR سلبي فاقل من 48 ساعة باش دار قبل السفر، والى كانو اجانب يديرو الحجر لمدة 10 ايام فوحدة من المؤسسات اللي مخصصاها الدولة لهذشي ويديرو التيست فالنهار التاسع، أو يديرو الحجر فالدار 5 أيام ويديرو التيست فالنهار الخامس بالنسبة للمغاربة.

وبخصوص الأطفال اللي قل من 11 لعام، فهوما معفيين من التيست سواء جاو من دول الليست “أ” أو “ب”، حسب الدورية دائما.