عفراء علوي محمدي- كود//

لحد الساعة مازال دفاع الصحافي المعتقل عمر الراضي كيتسناو الرد ديال استئنافية كازا بشأن طلبهم دالسراح المؤقت، اللي كان من المنتظر يتم البث فيه بعد نهاية الجلسة داليوم الثلاثاء، “لكن تسنينا وماوصلنا حتى خبار لحد الساعة”، كيقول محامي الراضي ميلود قنديل.

وزاد قنديل، فتصريحو ل”كود”، أنه فحدود غدا صباحا غيمشي للمحكمة باش يشوف مآل الطلب، اللي كيتقدمو بيه دفاع عمر الراضي للمرة الثالثة ووالو.

فسياق آخر، تكلم دفاع الراضي بحرقة على وضعيتو الصحية، بحيث كيقول انه بان، فجلسة اليوم اللي حضر ليها عن بعد، ضعاف بزاف، “مانقدرش نحكم مزيان لأنني ماتلاقيتوش من مدة وشغتو غير فالشاشة، لكن كلشي غيباء بعد نتائج التحاليل اللي دار، واللي ممكن تعطي معلومات على الوضعية الصحية ديالو بعد الإضراب عن الطعام، وكذلك مرض الامعاء اللي كيعاني منو”، كيقول قنديل.

ووضح قنديل أن الراضي كان منزعج لأنه كيتحاكم عن بعد، ورفض المحاكمة ديالو بهذ الطريقة، بحيث اكد انه ظن فالرول بأنه غيتم الذهاب بيه للمحكمة كما العادة، حتى كيتفاجأ بانهم داوه لقاعة داخل سجن عكاشة نيت، وهذشي خلاه يتصاب بالإحباط، لكن القاضي امتثل لطلبو بسرعة واجل محاكمتو فالحين.

وكشف قنديل أن المحاكمة كذلك تاجلات لإعداد الدفاع، بحيث المحامية مريم جمال الإدريسي سجلات النيابة ديالها على المشتكية حفصة الطاهري، بالإضافة للمحامية نعيمة لكَلاف من هيئة الرباط، بينما سحبات فاطمة الزهراء الإبراهيمي النيابة ديالها عليها.

وأجلات اليوم الغرفة الجنائية الابتدائية لاستئنافية كازا محاكمة الراضي حتى ل18 ماي.

والراضي متابع فحالة اعتقال بتهم “تلقي اموال من جهات أجنبية بغاية المساس بسلامة الدولة الداخلية، ومباشرة اتصالات مع عملاء دولة أجنبية بغاية الإضرار بالوضع الدبلوماسي للمغرب”، بالإضافة لتهمة “هتك العرض”.