كود علي زعتر ///

تبعت اللي تكتب من ردود ف”كود” على مقال مايسة سلامة الناجي. تبعتت اللي تنشر ف”كود” وحتى اللي ماشي ف”كود”. كاينين ردود افعال طلعات النيفو وناقشات وكاين اللي نزل النيفو وقلبها سبان ولقاها مناسبة لتصفية الحسابات مع مايسة.

فهاد المقال غاديين نردو على اللي بعقلهم. على اللي ناقشها ماشي اللي سبها. حقاش هاداك ما كيفهم الا لغة السب.

مايسة سلامة الناجي كتنتاقد بعض اوجه التوجه الافريقي للمغرب. من حقها. واش بغيتو حتى تصادرو حق بسيط هو دعم مباركة اللي كيجي من الفوق.

ثم اجيو بعدا. كيفاش تم اتخاد القرار بالانضمام الى الاتحاد الافريقي وهاد السياسة الافريقية. كيفاش شعب طيلة اكثر من نصف قرن الدولة دارت ليه كلشي باش يقطع تقريبا جذورو الافريقية…. بقات غير بعض الاشكال الفنية التعبيرية اللي بقات محافظة على راسها. بقات غير الموسيقى ديال كناوة ومهرجانها بالصويرة اللي كيربطنا بافريقيا. كلشي متبع فكرة الحسن الثاني. المغرب شجرة جذرها في افريقيا واغضانها تطل علي اوربا. بقينا شادين غير فالاغصان طيلة حكم الحسن الثاني.

مع الملك الحالي تغيرات الامور استرايتيجيا بلا ما نهيئو الشعب لهاد الشي. مشينا لافريقيا وجات عندنا افريقيا جنوب الصحراء كنهدر حقاش المغرب راه افريقي. وقعات مشاكل. مع مجيئ مهاجرين كانت ردة فعل الشعب فشي شكل. العنصرية اللي متجدرة فيه فاللا وعي ديالو ما تخدماتش.

فالاقتصاد مشاو شركات معينة. مثلا فالعقار ما مشاتش شركة بحال الشعبي وكانت سباقة لهاد السوق حقاش كانو غضبانين عليه. مشات شركات اخرى اليوم عندها بعض المشاكل. فقطاعات اخرى وقع نفس الشي

المهم ان الاختيار ديال افريقيا اللي حنا منها ما توجداتش ليه التربة. هاد الشي علاش اصوات بحال اللي ترجماتهم مقال مايسة سلامة الناجي موجودين. كاينين. خاصنا نسمعو ليهم ماشي نقمعوهم ولا نتاهمومهم بالجهل وووو