كود كازا//
قدم البروفسور ربيع رضوان رئيس قسم الصحة الجنسية بالمستشفى الجامعي الشيخ خليفة بكازا هاد العشية، نتائج استبيان ميداني خاص بتأثير إدمان التيليفون على الأداء الجنسي والقدرات الجنسية.
الدراسة لي دارت على 600 راجل ومرأة مزوجين وعندهم الهواتف الذكية، كشفت على أن %92 منهم كيستاعملو التليفون داخل بيت النعاس، و%50 مامرتاحينش في حياتهم الجنسية، و٪33 اعتارفو بأن الهواتف ديالهم خدات لهم الوقت كامل داخل بيت النعاس.
المثير في الدراسة هو أن الشباب من 20 عام حتى لـ 45 عام هما الأكثر تأثيرا بالهواتف لدرجة الإدمان داخل بيت النعاس، و ٪60 منهم تأثر آدائهم الجنسي، و ٪14 منهم اعتبروه هو المسؤول الأول على الضعف لجنسي عند لي كوبل.
الدراسة المعلن عليها كتقول أن إستعمال التليفون داخل بيت النعاس كيتسبب أيضا ففقدان التواصل بين الزوجين، وهادشي لي خلا %12 من العينة عندها ضعف جنسي واضح، ٪35 عندهم فقدان الرغبة الجنسية، و%16 من الرجال عندهم القذف السريع، و٪20ومن العيالات كيحسو بآلام حادة عند ممارسة الجنس.
حسب خلاصات الدراسة لي شاركو فيها خبراء في مجالات متعددة، هاد الإضطرابات الجنسية كتزاد حدتها مع تواجد التليفزيون داخل بيت النعاس وكثرت الأجهزة الإلكترونية في الدار، ولتجنب هاد المشاكل خاص الواحد يبعد ما أمكن من هادشي وخاصة داخل بيت النعاس.