وكالات //
قال جورنال “Daily Mail” البريطاني أن مرا اقتاحمت فترة الاستراحة ديال محاكمة جوني ديب وطليقتو أمبر هيرد، وبدات كتعيط على جوني وهي هازة بيبي رضيع واللي قالت ليه بللي هذا ولدك.
المرا بعدما دخلات شيرات بيدها لجوني ديب وبدات كتغوت: جوني، كنموت عليك.. أرواحنا متاصلة مع بعضها”
الممثل اللي كان واقف مع المحاميين ديالو فالكولوار ديال المحكمة، تعامل مع المرا المجهولة بلطف، وشير ليها بيديه حتى هو، وهي تعاود تقوليه: “جوني.. هاد الدري راه ولدك”، من بعد جاو عناصر الأمن وخرجوها على برا.
المرا بعدما تم استجوابها قالت أن جوني عزيز عليها وكتبغيه وكانت كتتمنى لو تجيها الفرصة تولد معاه، هادشي علاش دارت هاد “الفيلم”، ولكن راها دارتها غير بالضحك ومانواتش فيها شي حاجة خايبة!
جوني ديب قرر فاللخر أنه يسامح هاد المرا المجهولة وما يتابعهاش قضائياً واخا كان من حقو، خصوصاً أنها جات ففترة المحاكمة ديالو لمراتو السابقة اللي كتدوز صعيبة بزاف عليهم كاملين.
