محمد سقراط-كود///

بزاف ديال المغاربة مكيعتابروش بلي الفضاء العام ديالهم كأفراد وعندهم حق فيه، وأنه الى خربتي ووسختي الفضاء العام راه بحال الى كتوسخ دارك، بل العكس كيعتابرو أي حاجة برا دارهم أو بيتهم ماشي ديالهم ومعندهم حق فيها وهانية يخربوها او يوسخوها ومسؤولية نظافتها مكتعنيهمش بل من واجب الدولة تجمع ليهم زبهم من وراهم، وهاد الإعتقاد ماشي حكر على الحازقين او الأميين بل راه تقريبا معمم على كاع الطبقات والفئات ديال المغاربة غير هو كل ماتزاد التعليم والوعي والتمدن كل ما نقصات بحال هاد السلوكات، غير هو للأسف هادشي باقين كنشوفوه عند شباب صغار فالعمر لي من المفروض انهم تزادو فالمدينة وكبرو فيها خاص زعمة يكونوا تمدنوا، ولكن راه تمدنوا فقط حيت كيستعملو التيكنولوجيا أما السلوكات راه ديال مور الشمس.

دابا شنو معناتها أنه يتجمعوا شباب ويديرو فطور فالبحر ويتصورو ناشطين فرحانين موجدين الشهيوات وفاللخر ينوضوا ويخليو زبلهم تما ويزيدو، كيداير هاد الصيام وهاد الدين وهاد العبادات وهاد التمدن وهاد انستغرام لي مايردوكش على الأقل تجمع زبلك من وراك، كيتصرفو بحال الى غادي تجي مهم تخمل البحر من وراهم، جيل طالع باغي الدولة تقريه وتحفظو وتخليه يغش فالباك وتنجحو وتخدمو وتسكنو وتداويه وتربيليه ولادو وتجمعليه حتى زبلو من وراه، وتغسليه حتى مساطتو، جيل في بلادي ظلموني، حاس براسوا غير حيت كاين فهاد الوجود فراه خاص العالم يقابلوا ويخدموا ويوفرليه حياة زوينة بحال لي كيشوفها فإنستغرام.

مظاهر التاهيماجيت راها كاينة العام كامل، ولكن فرمضان المغاربة كيطيح عليهم الإيمان زعمة يعني من المتوقع أنه على الأقل تتوقف هاد التاهيماجيت ولكن للأسف كيبان بحال الى رمضان عندو أثر عكسي، بنادم كيزيد من تاهيماجيت والتحمرين والسلوكات الغير متمدنة، راه قبل الصلاة والصيام من شروط أنك تكون غير بنادم فقط، هو ماتلوحش الزبل فالزنقة وماتخليش بلاصتك خانزة وتحافظ على الفضاء العام حيت نتا ني تراه غادي ترجعليه مرة خرى، ولكن بنادم كيبان فات فيه الفوت وحتى هاد الجيل لي كان من المفروض أنه يكون مختالف على لي قبل منو واكثر تحضرا، طلع العكس ورجع اللور عوض يزيد للقدام.