محمد سقراط- كود ////

—
كاين تخوف كبير من طرف بعض المغاربة من صعود خيرت فيلدز للحكم بهولندا ، والكثير منهم سوقوا لينا صورة خيرت على أنه هيتلير بعث من جديد ، بالنسبة للمغاربة العايشين فهولاندا هذا رد فعل مبرر وعادي ، ولكن بالنسبة للمغاربة لي هنا لي كيسبوه وكيعتابروه عنصري وحاقد على الإسلام والمسلمين والمغاربة فهاد رد الفعل كالعادة صورة أخرى لسكيزوفرينية المغربية ، حيث غير اطلالة بسيطة على فيديوات تصريحات أو حوارات خيرت فاليوتوب غادي يبانليك أن السيد كيقول الهدرة لي كيقولها أغلبنا على الأجانب ، وماشي الأجانب لي من ديانات وأعراق مختالفة وانما غي الأجانب لي خارج مدينتنا أو حومتنا أو قريتنا .

أفلب المدن الكبرى أو القديمة غادي تسمع ناس منها كيهدرو على كيفاش كانت زينة ودابا عمروها لعروبية ، وكيفاش هاد المدينة كتعطي للبراني وولاد البلاد كتقواد عليهم ، كلنا شفنا منشورات ديال مدن شمالية مثلا دايرين شروط الزيارة بالنسبة لسكان الداخل ، كذلك من المدن المتقاربة كتلقى عنصرية كبيرة ولي مجانية وممبنية حتى على شي اختلاف كبير فقط الصدفة لي خلات كل واحد يتزاد فقنت ، أما ملي كنجيو للعنصرية اتجاه الكحلين هنا كاين الإبداع .

داكشي ديال كلو كلوس كلاين لي باقي كيتمارس فالمغرب ضد الأفارقة جنوب الصحراء ، والى جا عندنا شي مرشح كيدوي نفس هدرة خيرت فراه غادي يكتاسح وتقريبا راه مكتاسح دابا ، حيث بنكيران والحزب ديالو راهم جاين على أساس ديني عقائدي ممثلي الله والعفة والطهارة والأخلاق والمرجعية الإسلامية الإقصائية ، هادشي كلو كنمارسوه كدولة عنصرية بشكل فردي وجماعي ، ولكن غي كيتعلق الأمر بأوروبا كتلقى المغاربة خايفين من وصول اليمين فيها ، حيث بزاف كيحسبوها بحال الهايد بارك يمشي يخرى فيها على خاطرو ويجي وماباغيش لي يعكر ليه صفو هاد الحرية والديمقراطية لي ممآمنش بيها هو أصلا ولكن كيعيش بإمتيازاتها وكيعتابر الأمر استغلال لغباء الأوروبيين لا غير هاد الكائن المغربي السكيزوفريني هو لي مصوت على اليمين هنا وخايفو يطلع لهيه ، هو لي الى قلتيليه راه جاو مجموعة ديال الأجانب ودارو التبشير هنا غادي يطالب بحبسهم وترحيلهم ومحاربتهم ، بينما نشر الدعوة لهيه فأوروبا ضرورة حيث كنديرو فيهم خير وكندخلوهم لدين الحق ، وملي كيجي شي واحد بحال خيرت ضد هاد السكيزوفرينية كيوصفوه بمعاداة الإسلام والمسلمين والعنصرية والحقيقية مكاينش شي عنصريين قدنا ، وراه ماشي الغرب لي كيعادي الإسلام وإنما الدين ديالنا هو لي كيعادي كولشي .