الهاكا عطات دروس لـ”مومو” وهيت راديو: خاص احترام نزاهة البرامج وتكون مضامين اعلامية آمنة ويقظة و”المبادئ والقوانين” ماشي ترف
محمود الرگيبي – گود الداخلة //
استقت “گود” أراء مجموعة من أبناء وبنات ساكنة جهة وادي الذهب وسولاتهم عن تنظيم المنتدى الدولي كرانس مونتانا للمرة الخامسة بالمدينة، وطرحنا سؤال بسيط واش هادشي كان عندو شي فائدة على جهتهم كيف ماكتدعي الجهات المنظمة للمنتدى.
وفهاد الإطار جاوبنا محمد سالم وهو فاعل جمعوي نشيط، بأن مثل هاد المنتديات الدولية مزيانة للجهة، وكتجيب بزاف ديال الوفود الدولية باش تكتاشف جهة وادي الذهب، ولكن علاش كيتم إقصائنا وكنحسو عنا غرباء عن دشرتنا يعني مدينتنا، فيما الغرباء واصحاب الشكارة كنشوفوهم يحلبو المدينة.
فيما قالت مينتو وهي فاعلة جمعوية كذلك، بأن أهل الداخلة فقدوا الأمل فالمنظمين، لي ماكيشركو ولاد الصحرا فهذه التظاهرة، باش إيحسوا بأنهم ساهموا فإنجاح المنتدى لي كيتنظم فمدينتهم، وهذا لي خلى كرانس مونتانا للأسف يفقد قيمتو عام ورا عام.
هاد التصريحات لي گالو المواطنين الأصليين ديال المنطقة، كتجي رغم العمليات التجميلية لي كتقوم بها ولاية الداخلة فشخص لمين بنعمر لي ماكيبخل والو على المشرفين على التنظيم، بتنظيم سهرات ليلية وحفلات ماجنة للضيوف الداخلة باش يتبرعوا مزيان.
وفالحقيقة يقول أحد أبناء المنطقة “لگود”، هادشي كامل خلا الساكنة ساخطة على هاد المنتدى، لي ماكيحضر أبناء المنطقة ومايعطيهم القيمة لي تليق بيهم باش ايبنو للوفود الأجنبية واقع التنمية في المنطقة، والمجهودات لي كتبذلها الدولة فهاد المجال، ويدافعوا عن الوحدة الترابية للمملكة.
ومن جانب تاني علاش كيتم إقصاء المعطلين من طرف ولاية الجهة، وعلاش ماتم الإستعانة بيهم ويحضروهم باش يتحركوا فالمنتدى ويأطرو الزوار، وهوما الأولى بهاد النشاط بدل الإستعانة بأبناء كازا والرباط لي مسيطرين على كولشي، وهنا كلشي كيطرح التساؤل شمن فايدة جابها كرانس مونتانا لساكنة الصحرا …