كود هناء ابو علي ////

حتى وامينو العام يطيح من حكومة بنعرفة ومعه تمت الاطاحة بوزير الصحة الحسين الوردي٬ صنع حزب التقدم والاشتراكية الحدث. شي يساريين ماشي ديموقراطيين وزيد عليهم هادوك اللي التحقو باحزاب ادارية ومحتاقرين ريوسهم٬ شنوا هجوما كبيرا على نبيل بنعبد الله. كيتشفاو فيه كيتشفاو فمأله. مشكلة هؤلاء انهم ضد العدالة والتنمية لان جانبا في المخزن ضدها وصافي. بلا قناعة بلا خطاب مقنع لهذا الموقف.

نبيل بنعبد الله استخدم ذكاءه ودهاءه واليوم يعاقب على اختياراته السياسية. يحاسب على تصريح سابق في حواره مع الايام عند انتقاده “البام” واثارته اسم مؤسسه فؤاد عالي الهمة. الكل يتذكر بيان الديوان الملكي حول الموضوع. توقع من يريد نهاية التقدم والاشتراكية رحيلا قريبا لنبيل بنعبد الله. حقاش حزبو دار بيان تاريخي. وقف ورفض الانبطاح كيف ما انبطح ومازال ينباطح اتحاد ادريس لشكر. التاريخ غادي يسجل عليه مواقفو فحكومة بنعرفة فدورو فعدم قيام حكومة بنكيران.

بنعبد الله ما عمرو تذل وطيح السروال. رجع حزبو الصغير حزب عندو مكانة اكبر بكثير حتى من عدد مقاعده في مجلس النواب. دار تاكتيك سياسي بتحالفه مع البي جي دي. عرف باللي الاساسي دابا هو البناء الديموقراطي. هاد البناء دابا مع الزلزال فيه شقوق كثيرة تشكل خطورة عليه. تحالف معاه ولكن ما عمرو طيح السروال. تحالف معاه وبقى راسو مرفوع. خدا وزارات مهمة جدا بحال السكنى والتعمير وسياسة المدينة بالاضافة الى الصحة وكتابة دولة في الماء.

فين عمر التقدم والاشتراكية منذ الراحل علي يعتة كان عندها هاد الحضور هاد الوزن. قرار اعفاء بنعبد الله والوردي ضربة لهاد الدينامية وقد تصيب هذه الضربة في مقتل الحزب كله. الخاسر فهاد العمليات ديما هو المواطن. هو الوطن. هو التنوع. هو الديموقراطية