كود سبور//

علمت “كود” أن وحيد خاليلوزيتش الناخب الوطني سيكون حاضرا في الماتش، لي غادي يجمع المنتخب المحلي بنظيره الجزائري بعد غدا الأربعاء بالملعب البلدي في بركان، برسم الدور الحاسم من التصفيات الإفريقية المؤهلة إلى نهائيات كأس إفريقيا للأمم بالكاميرون 2020.

مصادر جامعية أكدت بلي خاليلوزيتش قرر يوضع حد للجدل، لي صاحب تصريحاتو السابقة، غادي يمشي لبركان ويتلاقا اللعابة ويدعمهم ويفرح فالماتش ديال الجزائر.
وما شي بعيد تكون الجامعة هي المنظمة اللقاء، باش تسالي نهائيا من هاد لازيزاني، لي نايض على المدرب مجرد أنه گال رأيو ف الحالة البدنية ديال لاعبي البطولة.

الجامعة وخاليلوزيتش قرروا يوقفوا هاد الضجة المفتعلة بلقاء مع اللعابة المحليين قبل الماتش وينتهي هاد الصداع.

خاليلوزيتش باغي يركز على المرحلة المقبلة تنتظره فيها ماتشات مهمة في الإقصائيات الإفريقية المؤهلة إلى نهائيات كأسي إفريقيا 2021 والعالم بقطر 2022، خاص التركيز بزاف على الأشياء المهمة باغيش يضيع وقته مع السماسرية لي دايرين البلبلة.