كود هناء ابو علي ///
علمت “كود” ان الوكالة الوطنية للمحافظة العقارية خلصات قيمة القمرين الصناعيين محمد السادس اللي كان طلقهم المغرب ف2017 و2018 من جزيرة گويانا الفرنسية. وفق مصدر “كود” فان المحافظة العقارية بسباب مداخليها قدرات تخلص 500 مليون اورو من الفترة اللي توقعات فيها الاتفاقية ف2013 ايام الرئيس الفرنسي السابق فرانسوا هولاند الى اليوم. كل قمر صناعي كيسوى 250 مليون اورو.
المحافظة العقارية وفق مصدر “كود” رفضات توصيات من الحكومة خاصة وزارة المالية باش تاخد قرض وتخلص هاد الشي. اعتمدات على راسها وقدرات تسالي كلشي ف2019.
دارها مزيان كريم التجموعي مدير الوكالة الوطنية للمحافظة العقارية باش ما داهاش فتوصيات ونصائح وزير المالية السابق محمد بوسعيد.
القمران الصناعيان المغربيان من نوع “بلياد استريوم” تطلق من قاعدة “كورو”، التابعة لمنطقة “غوايانا” الفرنسية. اللي بناه هو “إيرباص للدفاع والفضاء” الأوروبية بشراكة مع “طاليس ألينيا للفضاء” بالمعدات البصرية. الاول عندو مهمة الاتصال والمراقبة وخدم فالاراضي الزراعية وشغلاتو المحافظة باش يعاونها. القمر الصناعي الثاني عندو مهمة التجسس ومراقبة حدودنا اي عندو استعمال عسكري والمغرب بهادا كان ثالث دولة عندها هاد النوع من الاقمار بعد مصر وجنوب افريقيا.
هاد القمرين حياتهم قصيرة. بعد 5 سنين كتسالي مهمتهم.