ميريكان غادي تعطي مكافأة ديال 10 مليار لأي واحد غادي يعطيها معلومات على المشة الكحلة
كود كازا ///
على رقم اليوم خاص وزير الصحة ايت الطالب ماشي غير يعفيوه من منصبو بل خاصو يتحاكم. سياستو المتخلفة خرجات علينا. وصلنا ف24 ساعة ل1499 حالة اصابة بكورونا فيروس اكثرها فكازا. اللي فهاد الجهة تسجلات 498 منها 399 بكازا.
دابا ولى عندنا 36694 حالة. هاد الشي كيعني وفق مسؤول الصحة٬ اصبح عدد الاشخاص اللي صابهم الڤيروس هو 101 فكل مائة الف نسمة.
هاد الفيروس دار روكور فعدد القتلى وصلنا لـ23 مغربي تقتل بهاد الڤيروس.
علاش خاص هاد الوزير يخلص؟ حقاش فشل فتدبير هاد الملف. قلناها قبل وما سمع منا حد. واش بغيتو نوصلو لمائة قتيل فالنهار وتزيد تنهار المنظومة الصحية ديالنا للي اصلا منهارة عاد تتحركو.
هاد المسؤول بين على ان همو شخصي ماشي مسؤول كيدافع على قطاع. مازال كيعفي مسؤولين مازال مضارب مع اخرين. مازال فاشل فسياستو التواصلية. يجيب واحد ويبقى يعرض فالارقام ويمشي. غير على هادي خاصو متابعة.
عارفين منظومة الصحة ديالنا على قد الحال. الوزارة ما دارتش خدمتها. المواطنين دارو اللي طبقو منهم. كاينة استثناءات بحال كاع دول العالم ولكن الدولة الي خاصها تخدم. هاد الشي ما دارش.
وزارة الصحة بغات الداخلية دير الخدمة فبلاصتها. بغات السلطة تكلف حتى بالسبيطارات يمكن. واش كاين شي تخلف كثر من هادا