كود هناء ابو علي ///
البارح صرح واحد من المقربين من الممثل سعيد الناصري باللي بصاح كانت فيه “كورونا”. حتى هاد الشي مشكوك فيه كيف قال ل”كود” طبيب خدم فالكلينيك مول الفضيحة اللي كان ناعس فيه الممثل وهو كلينيك “انترناسيونال” فكازا.

الطبيب كيقول باللي ساهل دير شهادة لاي مواطن فيه كورونا. علاش مشكوك فيه؟ كلشي شفتو وبان ليكم كيفاش كان كيقول باللي كيموت والعذ بان صحيح.

واخا نفتارضو انو كان مصاب ب”كورونا” ولكن دار سيناريو باخراج غبي بحال اعمالو كلها باش يجلب التعاطف ولكن الاهم لكلينيك اللي عندو مشاكل كثيرة تبان صورتو مزيانة. اضعف جزء فهاد السيناريو باش كتب عبارة كيشكر لكينيك. طبعا غادي يكون خدا تعويض كبير علي هاد الشي.

طبيب خدم فهاد الكلينيك قال ل”كود” باللي دارو هاد الشي حقاش عندهم 4 الشكايات منها شكاية من عائلة رفضو يعطيهم جثة شخص كانت فيه كورونا ومات عندهم.

هاد لكلبنيك خاصو ماشي غير الاغلاق خاصو المتابعة. كان كيطلب حسب المصدر نفسو ل”كود” 12 مليون اللي دخل باش يتعالج من كورونا.

بعد ما الصحافة فرشات هاد المافيا ديال لكلينيكات عاد ناضو ينقصو الثمن. شي كلينيكات كيطلبو دابا 40 الف درهم وحتى هي غالية.

دابا خاص محاكمة سعيد الناصري وخاص محاكمة اصحاب لكلينيك وجمعياتهم. كلهم سكتو على هاد لفضايح وعندهم مسؤولية فهاد الشي.

كلينيكات كانو كيدخلو المرضي وكيمشيو يجيبو الدوا من المستشفى الحكومي وكاينين شهادات فهاد الشي. راهم مافيات حقيقية