كود هناء ابو علي كازا ///

فمطار محمد الخامس فكازا المخصص للرحلات الخاصة “كلاص آفير” البارح 26 يناير 2022 فحدود التسعود كانت جوج طونوبيلات. وحدة وصلات اللي جاو فرحلة خاصة فطيارة من نوع “هاوير 900” والثانية حتى هي جات فطيارة خاصة ولكن من ماركة اخرى. اللي كيجمع بيناتهم انهم بجوج جايين من مطار مالقا الاسبانية.

ورا هاد الطونوبيلات كانت طيارات لارام لكبيرة والمتوسطة واقفة. المطار لكبير بكاع التيرمينالات ديالو كيصفر. حالة خايبة كتعطي الانطباع علي بلاد تالفة اختارت ضرب السياحة. اختارت تسد حدودها بمبررات غبية. عبثية.

كل رحلة من هاد الرحلات كان فيها ما بين 7 و6 لمغاربة او اجانب حصلو برا وعندهم خدمتهم واقامتهم فالبلاد. كل واحد عندو قصة خلاتو ياخد رحلة خاصة. خلاتو يخلص تقريبا شي الفين اورو اي  20 الف درهم ل45 دقيقة٬ زمن اللي كيتستغرقو الرحلة من مالقا لكازا.

فمطار مالقا المخصص للرحلات الخاصة واللي جا حدا اوزين البيرا “سان ميگيل” فحدود الخمسة ونص٬ كان باگاج جوج رحلات غاديين يخرجو. بجوجهم لمطار محمد الخامس وثالثة كانت فنفس اليوم مشات لمراكش. حسب مسؤولة على الاستقبال فهاد المطار ل”كود” عدد الرحلات للمغرب تضاعف بزاف بزاف. كاين اقبال ما عمرو كان فالسابق. هاد الشي بدا هادي شهر تقريبا.
بدا بعد ما عاقت وكالات اسفار بهاد القضية ديال الطيارات الخاصة. فجوج الرحلات ديال 26 يناير 2022 رقم CNRBS وCNTKD خرجو تقريبا فنفس الوقت بعد تأخير للاولى وصل لساعتين تقريبا. فهاد الرحلة كانت مبرمجة تخرج مع الخمسة ولكن تعطلات الطيارة باش توصل لمالقا. هاد الطيارات كيوصلو خاويات. بحال طاكسيات الكورسة. كتجي لمالقا وتعمر وكتحسب ثمن يغطي ليها الذهاب والاياب. فالرحلة للي خرجات مع الستة و50 دقيقة فالعشية حتى واحد ما كيعرف الثاني. 7 الاشخاص فيهم ثلاثة الاجنبيات من ايطاليا والسويد و4 مغاربة واحد فيهم اللي حصل برا وعايش فالبلاد ولخراين كلهم شي عايش فهولندا شي ففرانسا.

كلها وقصتو. كلها وعلاش خدا هاد الطيارة وخسر هاد لفلوس باش يخدم. ماشي كليانات ديال هاد النوع من الطيارات. “ما كانش شي حد اخر. ساكنة فالبندقية ومشروكة مع مغاربة فمعمل ديال الزرابي. خاصني ندخل بعد ما دوزت عطلة راس العام العائلة” تحكي الايطالية اللي ساكنة فكازا ل”كود”. هادي باش تاخد هاد الرحلة تسخسخات تسخسيخة كبيرة “خديت رحلة من ايطاليا لمالگا بعد ما قطعت فرحلة خاصة. وصلت للصبليون لقيتهم لقاو الرحلة. بقيت 5 ايام فمالقا باوطيلها بمصاريفها حتى لقيت هاد الرحلة” تحكي الايطالية ل”كود”.

يعني خسرات بزافت لفلوس بسباب قرار غبي متخلف ديال اغلاق الحدود.

لكن قصة محمد اللي جاي من هولندا كانت قاصحة. محمد كان عايش مع امو. هو اصلو من مدينة الناظور. امو ماتت فهولندا قبل ايام. كان وعدها تدفن فالمغرب. وجد باش يرسلها وقبل جا من امستردام لمالقا ومنها خدا هاد الرحلة. باش وصل غادي يبقى فالرباط حتى توصل جثة امو ويدفنها فارضها وترابها كما حكى ل”كود”. ما فهمتش علاش هاد الحدود مسدودة. علاش كتعامل الدولة مع مغاربة العالم بهاد الطريقة. “كدير كلشي باش تقطع مع هاد لبلاد. باش ما تبقاش ترجع ليها. علاش بوحدنا فالعالم سادين الحدود. علاش نخسر هاد لفلوس كلها باش نحقق امنية  لاعز ما عندي وهي امي. رحلة عادية كانت غادية تكلف اقل” يوضح محمد ل”كود”.

هاد الرحلات تضيف زبونة اخرى ل”كود” دارت باش ترفح الشركات الخاصة. اللي خدامين فالطيارة كيهدرو على اقبال ما عمرهم شافوه فحياتهم على هاد الطيارات من لمغاربة او اللي كيجي للمغرب.

لكن واش هاد الرحلات فيها مراقبة؟
“والو. ما كاينة حتى مراقبة” يوضح احد الزبناء ل”كود” “فمطار مالقا الخاص بالرحلات الخاصة٬ كياخدو الباسبور ديالك وكيديوه عند البوليس. كيرجعوه ليه. حتى حد ما كيسولك لا على الباس فاكسينال ولا على البي سي ار” تقولبت ودرتو وصافي” يضيف مصدر “كود”

فمطار محمد الخامس كاين فيلم حامض كثر. كتدخل لقاعة. كيجيو ياخدو الباسبورات وكتعمر جوج الوثائق. بعدها جات جوج بنات. هما اللي مكلفات بتسيت انتي جيت”. وحدة فيهم كانت كتكحب. واحد من المسافرين قال طانز “وا هادي خاصها دير تيست بعدا٬ نعرفو واش فيها “كورونا ولا اللا”. هاد البنت خدات شي عينات وخلات صاحبتها تكمل.

خداو العينة بحنان وضرافة. هنا فمطار محمد الخامس التيرمينال 3 الخاص بهاد النوع من الرحلات حتى واحد ما سول على الباس فاكسينال. كيطلو على “البي سي ار” طلة خفيفة وصافي. هاد الشي كلو فشي شكل. حتى واحد ما كيراقب.

من بعد كان مشكلة فوزارة بوريطة اللي ما عطاتش للبوليس الموافقة باش تطبع الباسبورات. هاد التأخير دام ساعة ونص تقريبا.

السلطات الامنية من بوليس ودرك وديوانة ما فاهمين والو فهاد الفيلم ديال الرحلات الخاصة. كيديرو خدمتهم ولكن ما فاهمينش هاد الفيلم ديال تسد الحدود وتخلي غير الطيارات الخاصة

هاد القرار اللي كيتشرف عليه وزارة بوريطة فضيحة كبيرة. بوريطة كيعاون تجار كورونا باش يترفحو. كيخلي مغاربة مقاتلين مع الوقت يخسرو فلوس كثيرة باش يدخلو ضروري لبلادهم.

هو اللي كيعطي التصاريح. هو اللي كيعطي الرخص. كلشي ساكت عليه. حتى باش جا فالبرلمان كان ضحكة. عطاها غير للفايك بحال قضية ان شي دول فتحات حدودها وتراجعات.

اليوم هاد الوزير كيساهم باش شركات الطيران الخاص تجمع لملاير وحتى حد ما قادر يوقفو على حدو. كلشي كيتفرج فيه