الرئيسية > آراء > خاص سيدنا يزورها. زلزال مافيا العقار فكازا اللي كيخرقو القانون كيوجدو قنابل موقوتة للبلاد. ايلى ما تحاكمش مدير الوكالة الحضرية فكازا على هاد لفضيحة وتحاكمو معاه اللي دعموه راه لبلاد غادية للهاوية. الطاشرون الخيمة خدا 3500 دالسكن الاقتصادي فخرق لكل القوانين
31/03/2023 12:00 آراء

خاص سيدنا يزورها. زلزال مافيا العقار فكازا اللي كيخرقو القانون كيوجدو قنابل موقوتة للبلاد. ايلى ما تحاكمش مدير الوكالة الحضرية فكازا على هاد لفضيحة وتحاكمو معاه اللي دعموه راه لبلاد غادية للهاوية. الطاشرون الخيمة خدا 3500 دالسكن الاقتصادي فخرق لكل القوانين

خاص سيدنا يزورها. زلزال مافيا العقار فكازا اللي كيخرقو القانون كيوجدو قنابل موقوتة للبلاد. ايلى ما تحاكمش مدير الوكالة الحضرية فكازا على هاد لفضيحة وتحاكمو معاه اللي دعموه راه لبلاد غادية للهاوية. الطاشرون الخيمة خدا 3500 دالسكن الاقتصادي فخرق لكل القوانين

كود سعيد الشاوي وهناء ابو علي ///

هادي ايام كتبنا على فضيحة كبيرة بطلها نوطير دخل للبرلمان على التراكتور وتقرب من الرئيس السابق للجنة الداخلية اللي معاه فالحزب وولى يحضر فين ما كيجي وزير الداخلية٬ حتى اكتشفنا مؤخرا ان النوطير اللي كان كتب العقد بين بيع “اليانس” ديال العلمي الازرق وبنك عثمان بنجلون هو اللي غادي يدوز يشري 48 هكتار كاينة فبوسكورة بإقليم النواصر، والتيتر فونصيي رقمو دي 26460 وغادي ياخد نسبة كبيرة من السكن الاقتصادي. خدا الترخيص من عامل النواصر ومن مدير الوكالة الحضرية. شراها على رجل اعمال اخر قدم اكثر من مرة نفس المشروع وبغى قل من هاد الشي اللي عطاوه للنوطير وما داوهاش فيه.

حدا هاد المشروع كاينة فضيحة اخرى. ناس الداخلية من العامل ديال المنطقة وعامل الوكالة ما بغاوش يغمضو عينيهم غير على مشروع هاد النوطير صاحب وزير الداخلية كيف كيقول٬ بل دوزو ضوسي اخر لشي طاشرون اسمو الخيمة. دخل للمشروع باسم شركة “بانوراميك”.

اش قصة هاد الطاشرون الخيمة اللي كلشي عندو مايل وكيفاش تسافد من الديروگاصيون اللي يستحيل ياخدها شي طاشرون فالبلاد؟

القصة بدات باش كان الطاشرون ومول الكتبية الطاهر دخل ايام الياس العماري للبرلمان باش يقاد مشاريعو المتعثرة منهم هاد المشروع. شرا شي 80 هكتار فبوسكورة. باش هاد الطاشرون يربح مزيان خاصو يستافد بزاف من السكن الاقتصادي. الرخصة الاولى تعطات لشركة “الكتبية للتعمير” فيها شي 1500 من السكن الاقتصادي والباقي فيه شقق موايان ستاندين ديال الطبقة المتوسطة وفيلات وطبعا مشاريع بحال هادي كتكون مناطق خضراء وتجهيزات ضرورية للحياة اليومية للسكان الجدد.

شركة الكتبية للعقار ما خلى ما دار باش يزيدو ليه فالسكن الاقتصادي. ما خلى فين مشى باش يستافد من ديروگاصيون ووالو. دخل فالبيعة والشرية طاشرون اسمو الخيمة. جا للبني من التعاونيات. عندو تاريخ ديال الخيمات. فيه الظلام بزاف. عندو مشاكل مع الضرائب. مشاريعو فالتعاونيات كانو فشي شكل. كاين تعاونيات باسماء مستعارة دارها قدراتها مصادر ل”كود” بشي 200 مليار سنتيم.

ما علينا. نرجعو لهاد الترخيص التاريخي. باش الطاهر فشل يبيع هاد المشروع حتى بقع باع هاد الشي للخيمة. صاحبنا بدعم من جوج ابراهيم مرابط رجل سر المدير العام العامل للوكالة الحضرية بنعلي وعشيرو ودخل شي حد اسمو باسم حي فالرباط قدم راسو شخصية نافذة فكازا كيحكم فكلشي. كيخاف منو الوالي وغيرو.

طبعا الخيمة حصل على ترخيص ماشي غير ديال اضافة 3500 من السكن الاقتصادي بل عطاوه امكانية بيع لبقاعي. واييه. واش هادي دولة. هاد الشي راه شغل المافيات. كيفاش يرخصو للخيمة اللي رفضوه للطاهر. علاش يخرقو القانون

دابا راه ما عمرها كانت فتاريخ المغرب شي حد خدا هاد الجوج وكثر من هاد الشي المشروع سالى نسبة السكن الاقتصادي ديالو.

يتزاد علي هاد الشي كولو فضيحة اخرى اخطر. باش تحصل علي السكن الاقتصادي خاصك شركة ديالك عندها اتفاقية كتخص هاد السكن الاقتصادي. هنا وقع تحايل اخر٬ شرا شركة الكتبية للتعمير اللي كان عندها الاتفاقية وشرا منها 1 بالمائة وخلق شركة جديدة. هادا تحايل علي القانون.

فالحقيقة ماشي غير بهادي تحايلو على القانون. كلشي مثير وعجيب وغريب. حتى اللي كيمول هاد الخيمة شي رجل اعمال ليبي مخبي ببيع لعجولة وممنوع يدخل لبلادو وعندو جنسية تركية دابا.

علاش هاد المشروع فضيحة وخاص يتحاكم فيها ماشي غير العامل مدير الوكالة الحضرية ومحاسبة عامل بوسكورة وكاع اللي دخلو فيه؟ حقاش هاد الطاشرونات ما كيهمهمش مستقبل لبلاد. فهاد المنطقة كاين تقريبا 30 الف وحدة من السكن الاقتصادي موزعة على اكثر من شركة. باش يتخرق القانون وتزيد ل”الخيمة” 3500 راه كتزيد تغرق المنطقة.

الدولة عندها فلسفة واضحة. باغية تخلق سكن اقتصادي بتوازن مع الفيلات ومع السكن ديال الطبقة المتوسطة. هاد التوازن مهم بزاف. مهم فالمجتمع. مهم للتعايش. مهم للبلاد. باش كيكون خلل فالتوازن كيخلق افات كثيرة. ف2003 ضربنا الارهاب وكان من اسبابو الاهمال والفقر والاقصاء اللي عاشوه شباب ولقاهم الارهاب طايبين. هاد الشي غادي يتكرر مع تصرفات هاد رجالات الدولة.

الحل اليوم هو يتفتح تحقيق عاجل فهاد الملف وملف النوطير. كيفاش خداه وعلاش وشكون دعمو. خاص هاد المشروع ديال 3500 شقة للسكن الاقتصادي اللي غادي يربح منو بزاف “الخيمة” يتلغى. مالين لفلوس ما سوقهم فحد. يديرو يدهم مع الشيطان غير يجمعو لفلوس. خاص اللي عندو عقل فالبلاد يوقف هاد لفضايح.

سيدنا ايلى جا لكازا كيف ما هو متوقع خاصو يدير شي دويرة فبوسكورة. غير دخلتو غادية تخلي هادو مالين لفضايح يتعراو. غير جولة تفضح كلشي.

موضوعات أخرى

28/03/2024 12:30

من هنا لسيمانة.. اللي عندو شي طوموبيل أو موطور ففوريانات كازا ومجاش سحبهم غيتباعو

28/03/2024 12:20

جنايات فاس فرقات 33 عام ديال الحبس على ريزو د التهجير السري وها التهم اللي تابعوا بها

28/03/2024 12:19

ليلة “العشاء الأخير” فحزب الاستقلال: هادي 3 قضايا كبرى غادية تشعل حروب ف “الميزان” قبل وبعد المؤتمر

28/03/2024 12:10

جوندارم الدروة طيحو  بزناز عندو الحشيش والبوفا والغبرة والقرقوبي نواحي برشيد

28/03/2024 11:30

فهم تسطى مع نظام العسكر.. الجزائر عينات جوج قناصل فالمغرب واخا دايرين القطيعة معانا

28/03/2024 11:00

إدانة المحاميين د الرابور “ديدي” مداهمة الفيديراليون : زادو فيه وهذا” فخ”