ناس تندوف هدموا أطروحة البوليساريو: ما كاين لا عِزة لا كرامة وكاين غير التعذيب والتقتيل والاختطاف
محمد سقراط – كود//
بنادم النهار كامل وهو يبارطاجي فإنجازات أردوغان الحقيقية والوهمية، أردوغان دشن هنا أردوغان فتاتح لهيه وفرحان بحال الى داكشي كيتدشن فبلادو، والنهار كلو وهو يلحس فطيز أردوغان ( يمدحه بتملق) ويتجدر علينا حنا ولاد بلادو” شوفو أردوغان آش دار لبلادون شوفو أردوغان آش فعل، يا ليت الحكام العرب كلهم أردوغان علاش حنا معندناش رئيس بحال أردوغان، أردوغان تاج راسكم يا حمير”، ونهار كيتدشن ي مشروع كبير فالمغرب كتلقا نفس الشخص شاداه السخانة ومكره وكاعي وكيندب، علاش بناو السبيطار بفلوس السبيطار كانو يبنيو جوج مدارس، علاش بناو المدرسة بفلوس المدرسة كانو يدوزو جوج طرقان لدوار رجا فالله، ونهار كلو وهو يصرف موازين شحال فيه من سبيطار وموسم مولاي عبد الله شحال فيه من مستوصف وتي جي في شحال فيه من مدرسة.
مشاكل هاد البلاد كثيرة ووحدة منها أنه ولاو وسطنا مغاربة عاطيين راسهم للبراني وكيكرهو بلادهم وكيفضلو بلادات الناس على بلادهم، كاين لي يفضل يتمارس عليه القمع فتركيا ويمشي للحبس تم كاع وغادي يديرليها مبررات، ولكن هنا الى غير صفر عليه بوليسي وهو مخالف القانون كيولي يهدر بحال شي ناجي من الهولوكوست، وهاد الأمر مكيتعلقش غير بالخوانجية بل بكاع الإيديولوجيات كهم عاطيين كرهم وروحهم ودماغهم للبراني على حساب بلادهم، ومتبنيين كاع قضايا العالم ومخليين قضية بلادهم لي هي الأولوية والأهم، هاد الفيروسات البشرية راهم جزء من تأخر هاد البلاد حيت فكل مرحلة من مراحل التاريخ الحديث للمغرب، ديما كانو مغاربة عايشين فيه وكارهينو وولائهم للأجنبي على حساب بلادهم، وكون غير كان بشي مصلحة.
خاص تكون قليل الأصل باش ماتنبغيش الخير لبلادك وماتبغيش تشوفها حسن، إلى كان عندك موشكيل مع النظام ولا الدولة فراه معروف كيفاش تفاريها معاها والطرق وواش عندك الكبدة للمواجهة، أما باش النهار وماطال وبنادم كينفث السموم ديالو فإنتقاد البلاد وأي حاجة كتطرى فيها فراه بزاف، واه بنادم وصلات بيه البجاحة لأنه مايفرحش حتى لتأهل المنتخب المغربي بدعوى أنه غير مستحق، حقا الدولة عندها عيوبها بحال أي دولة فالعالم، وفأي دولة راه كاين احتجاجات ولكن راه مستحيل تلقى فرنسي عندو ولاء لرئيس الفلبين كثر من بلادو، أنك تختالف مع النظام حاجة وأنك تكون بياع حاجة خرى.