محمد سقراط-كود///

الخيانة الزوجية فعل كيهم وكيأثر على الأشخاص المعنيين بيه، أي واحد خان مرتو أو مرة خانت راجلها فراه مكتشكل حتى شي تهديد على المجتمع أو الدولة باش تكون العقوبة السجن، راه لا يعقل أنه يتحبس مواطن أو مواطنة راشدين مارسو الجنس عن طيب خاطر مع بعضياتهم وتنوض الدولة تخشى وسطهم كطرف تالث وتعاقبهم حيت مكانوش ملزمين بعقد النكاح لي داروه مع الشركاء ديالهم، وماشي أي عقوبة راه الحبس النافذ وكيوصل حتى لعامين، عامين ديال الحبس على نيكة مرعودة بالتخبية على الزوج أو الزوجة، راه بزاف هادشي أحكام ديال القرون الوسطى، المنطق كيقول أن أقصى عقوبة على الخيانة الزوجية هي الشريك لي حصل بيها مكيتسال والو، ولكن في المغرب كاين أغرب قانون في العالم، الى حصلو جوج بالخيانة الزوجية وواحد فيهم تنازليه الشريك ديالو لاخر الى كان زوفري هزو لما وكيضرب الحبس بينما لي حصل معاه مكيدوز حتى نهار بالتنازل ديال الشريك، منطقيا مالاصقاش مع بعضياتها ولكن كاينة هنا.

واحد الحلقة من البرنامج الإذاعي هاربون لي كيديرو عبد الصادق بنعيسى كان هدر على قصة واحد القواد كيتزوج ديما بربعة ديال العيالات وكيخدمهم في الدعارة ولي تشدات فيهم كيمشي يقدم ليها تنازل وتخرج كتجري وطبعا إكتشف أمره ودوز حبيس، ولكن شوفو على ثغرة قانونية قداش وفين كيتم إستغلالها، بالإظافة شحال من واحد أو وحدة كيتعرض للإبتزاز من طرف الشريك ديالو الى حصل بالخيانة من أجل التنازل، كاين لي مكتجيبليه مرتو التنازل حتى يكتب ليها شي حاجة، أو لمرة تتخلى على شنو كتملك مشترك أو تستحق، راه ماقانون ما تلعبة ومكيحميش نهائيا المغاربة بل العكس راه ثغرة قانونية كتستخدم فكولشي إلا فأنها تأدي دورها كنص قانوني كينظم الحياة فالمجتمع وفق قواعد معينة.

كولشي حاليا متبع قصة المحامي المشهور والنافذ في كازا ولي تشد بالخيانة الزوجية مع وحدة أصلا خاطبها وعندو معاها علاقة موثقة بمجموعة من الصور كثر من صور كأس إفريقيا الوحيد لي ربح المنتخب، ومع ذلك هو خرج حيت تنازلات ليه مرتو المحامية والبنت لي كانت معا هراها كتضرب في الحبس حيت مارسات الجنس بخاطرها مع شخص بالغ لكن متزوج ومحامي ومرتو محامية، فيناهو المنطق فهاد القضية حتى الى كان القانون باغي يعاقب على ممارسة الجنس فراه خاص يعاقب الطرفين ماشي طرف يستافد من كونو مزوج بشريك معندوش مشكل مع الخيانة ومستاعد يسامح ويتنازل فأي لحظة، وطرف حيت غير متزوج يمشي يدوز الحبس، راه خاص الدولة توفر للمواطنين ديالها الشروط الصحية لممارسة الجنس ماشي تديهم للحبس الى حصلوا كيديروه ولي مزوج يسمحليه الشريك ديالو ويخرج منها بحال الى ما وقع والو فيناهو المنطق فهاد القانون.