الرئيسية > آراء > خاص الدولة تتدخل وترد للمغاربة الشواطئ ديالهم لي حتلوها صحاب الباراسولات والكارديانات
12/06/2022 17:00 آراء

خاص الدولة تتدخل وترد للمغاربة الشواطئ ديالهم لي حتلوها صحاب الباراسولات والكارديانات

خاص الدولة تتدخل وترد للمغاربة الشواطئ ديالهم لي حتلوها صحاب الباراسولات والكارديانات

محمد سقراط-كود///

الإصطياف في المغرب تحول من متعة لمعاناة وصراع يومي مع محتلي الملك العام وقبالت السلطات كتشوف ومكتدير والو، أي بحر كتمشي ليه حاليا كتلقى مول الباراسولات جا مع النبوري ونشر الكراسا ديالو على طول الشاطئ واحد لاصق في لاخر من الراس للراس، هاديك الكلسة قريب للما متبقيتيش تحلم بيها إلا الى كريتي من عندهم البلاصة باراسول وكراسة وطبلة ونتومة عائلة على الأقل خاصك واحد المية درهم، المشكل هو هانية إلا كانت اختيارية يعني واحد عندو كراسة ومضولة مجموعين في قنت ونتا الى حتاجيتيهم كتكري من عندو، هادي راه حاجة زوينة تتوفر بحال هاد الخدمات في الشواطئ ، ولكن في المغرب الموشكيل هو مول المضل كيوصل وكيقطع طرف من الشاطئ ويعمرو بالمضولة ونتا حتى الى جبتي مضلك وكرسيك مكتلقاش فين تكلس وتستمتع بالبحر حيت غطاوه بالمضولة، هادشي بلا منهدرو على صحاب النوايل لي كيردو البحر بحال شي مخيم ديال اللاجئين.

وقبل مول المضل كاين مول الجيلي أخطر فيروس كيعاني منو المغرب حاليا، أخطر من كورونا وجذري القرودة هذا راه جذري الطفيليات المعدية كيتكاثر بسرعة وبقوة وكينبث في أي بلاصة فيها طوموبيل واقفة، ويقدر ينبث لشي وحدين عن باب دارهم، بالتجربة مشيت لشي بحورة جاو في الخلا والقفار كتلقى طوموبيل أو جوج واقفين كتبلاصي حداهم كتنزل للبحر فاش كتطلع بالعشية كتلقى واحد واقف حدا الطوموبيل وكيتسناك تخلصو حيت كان حاضيها من راسو، الدنيا خاوية كتصفر كاين غير هو بوحدو الى ماجاش الخطر منو معندو منين يجي اذن الى طلب لخلاص فراه كيتخلص على مادار للطوموبيل والو ماشي على كان عاس عليها وحاضيها من الأخطار.

الموشكيل الكبير هو هادشي كيطرى والمخزن والدولة كيتفرجوا ويشوفوا بعينيهم كيفاش واحد النوع ديال المغاربة احتل الملك العمومي صحة وبدا كيجمع في الزطاطة بشكل يومي بلا مايخلص ضريبة أو مستحقات لأي واحد من غير تدويرة هنا تدويرة لهيه وشادها بالصحة وقصوحية الوجه، دابا الواحد ماحيلتو للتضخم وصاليرو لي نقص ومابقى كافيه لوالو ماحليتو لمعارك يومية ضد الزطاطة والمبتزين لي باغين ينتفوا منو أي درهم عندو في جيبو، حتى كيولي الواحد يكره يخرج من الدار أو يسافر كاع، النتيف والإبتزاز ملي تخرج، لوطيل غالي وكيزيد في الثمن في الصيف، الديور ديال لكرى أغلبها موسخ وقليلة التجهيز وفي أوقات الذروة كتولي بثمن أوطيل سانك ايطوال في بعض البلدان السياحية ديال بصح، وملي توصل لهاداك البحر تلقاه مستعمر من مول الباراسولات والكارديانات وصحاب جيت سكي والبيدالو، خاص الدولة تتدخل وترد للمغاربة الشواطئ ديالهم لي حتلوها صحاب الباراسولات والكارديانات.

موضوعات أخرى

28/03/2024 14:28

واش الحكومة غاتحل الحمامات مور الشتا لي طاحت.. بايتاس لـ”گود”: على حسب كل إقليم والوضعية ديال الماء فبلادنا صعيبة ونسبة الماء لي دخلات للسدود ضعيفة

28/03/2024 14:00

“الهاكا” مسؤولة على فضيحة “مومو” مع “هيت راديو”. كيفاش تعطلات تخرج قرار فاكثر منشط عاقباتو

28/03/2024 13:30

وزير النقل للساقطين فامتحان البيرمي: غانعطيوهم فرصة جديدة ومغاديش يتحسب امتحان الاثنين والهدف من الأسئلة الجديدة هو نقصو من الكسايد

28/03/2024 12:45

ليلة “العشاء الأخير” فحزب الاستقلال: هادي 3 قضايا كبرى غادية تشعل حروب ف “الميزان” قبل وبعد المؤتمر

28/03/2024 12:30

من هنا لسيمانة.. اللي عندو شي طوموبيل أو موطور ففوريانات كازا ومجاش سحبهم غيتباعو

28/03/2024 12:20

جنايات فاس فرقات 33 عام ديال الحبس على ريزو د التهجير السري وها التهم اللي تابعوا بها

28/03/2024 12:10

جوندارم الدروة طيحو  بزناز عندو الحشيش والبوفا والغبرة والقرقوبي نواحي برشيد