كود الرباط//
فضيحة وقعات لبارح فكازا، إدارة مارشي الكرنة لي كتسيرو شركة التنمية المحلية منعات برلمانيين يدخلو يديرو خدمتهم، وخلاوهم واقفين قبالت الباب كثر من نصف ساعة.
الواقعة طرات مع 7 صباح تقريبا من يوم الاربعاء 14 شتنبر 2022، حسب مصدر برلماني لـ”كود” :” مبغاتش المديرة تدخلنا، وهادي اهانة وسابقة فتعامل مديرة مصلحة مع المؤسسة البرلمانية”.
ورغم توصل الكرنة بمراسلة رسمية من رئاسة مجلس النواب بخصوص هاد المهمة الاستطلاعية، الا ان المديرة منعات الوفد البرلماني خصوصا وان ديك الوقت الكرنة فيها الفوضى.
فاش تعرضو للمنع، حاول عدد من النواب اتصلو بالعمدة نبيلة الرميلي، لكن مكتجاوبش.
اللي لقاو فباب الكرنة كيقولو ليهم المديرة فعطلة، والناس العادية تدخل والبرلمانيين لا.
وقبل من هاد الزيارة حسب معلومات “كود”، الوفد البرلماني كان فـ”اوطيل” ريجينسي فكاز، فاق مع 3 ومشاو من قبالت الاوطيل مع 3.30 فاتجاه سوق الجملة للخضر والفواكه.
الوفد البرلماني لقا الفوضى فسوق الجملة، وكولشي كيتشكا من سوء التسيير ديال شركة التنمية المحلية.