نهضة بركان غيمشيو من مطار الجزائر للوطيل يرتاحو والكاف عطاهم ضمانات على التونيات
سهام البارودي – كود//
لي محلولين فالمدن المغربية كاملة ! الثمن زايد على الحمام الشعبي و الخدمة مختلفة نوعا ما و لكن فالعمق راه نفس الحاجة ! حمام كايتجمعو فيه الناس و كايغسلو ! بلا كمامة ! بلا تباعد ! الطيابات مايمكنش يديرو الكمامات حيت كايفزگو ليهم و حيت الخدمة ديالهم وسط السخون كاتفرض عليهم انهم يتنفسو بلا ماتكون الكمامة حاجز ! فحال واحد كايجري او كايسوگ البشكليطة مايمكنش يدير كمامة كذلك الطيابة !
وانا كانغسل تفكرت بلي الحمامات الشعبية مازالة سادة ! يعني لي عندو واحد ثلتالاف ريال ممكن يغسل فالسبا و يسخن فالصونا و يحك و يكمد عظامو ! و لي ماعندوش يدوش فدارو اذا هوا عندو الدوش و ماساكنش فبيت مع الجيران و طواليط مشروكة !
السدان ديال الحمامات و فالمقابل الحلان ديال les spa ! راه مايمكنش نفسروه الا بالحگرة ! حگرة للمزاليط من الشعب ! حيت نفس الكونصيبط ديال الحمام هوا هوا ديال السبا ! غير هذا بتلتالاف و ربعالاف و لاخور بعشرة دراهم و ميتين و ستين ! نفس كورونا ! نفس احتمال الاصابة ! نفس عدم احترام الاجراءات ! يعني ماكاين حتى شي سبب كايجوستيفيي انه واحد يبقا محلول و لاخور يتسد !
الحمام مرفق عمومي مهم لشرائح مهمة من المزاليط و ذوي الدخل المحدود و الاسر الكبيرة لي مايمكنش كل فرد فيها يخلصو عليه ربعالاف باش يغسل مراودو ! هادشي علاش كانتمنى يتحل فالقريب العاجل و يكونو طبعا اجراءات صارمة لضمان عدم انتشار العدوى فيه!
كان الزلط صاڤا موالفينو ! ولكن باش نزيدو الزلط على الوسخ راه لايلاها يالله !